guzishta shab jo hasti bar-faraaz-e-dar thi main tha

guzishta shab jo hastī bar-farāz-e-dār thī maiñ thā

phir agle din jo surḳhī shaukat-e-aḳhbār thī maiñ thā

vahāñ kuchh log the ilzām the baaqī añdherā hai

bas itnā yaad hai jallād thā talvār thī maiñ thā

jahāñ tasvīr banvāne kī ḳhātir log aate the

vahāñ pas-manzar-e-tasvīr jo dīvār thī maiñ thā

maiñ apnā sar na kartā pesh ujrat meñ to kyā kartā

tumhārī baat thī vo bhī sar-e-bāzār thī maiñ thā

ye vīrāñ surḳh sayyāre inheñ dekhūñ to lagtā hai

tirī duniyā meñ jo chahkār thī mahkār thī maiñ thā

ḳhafā mat ho mire badle vahāñ gul-dān rakh denā

tire kamre kī chīzoñ meñ jo shai bekār thī maiñ thā

tumhāre ḳhat jo maiñ ne ḳhud ko Daale the nahīñ pahuñche

tū anjāne meñ jis ke pyaar se do-chār thī maiñ thā

mire khaliyān the dahqān the taqdīr thī tū thā

tirā zindān thā zanjīr thī jhankār thī maiñ thā

guzishta shab jo hasti bar-faraaz-e-dar thi main tha

phir agle din jo surKHi shaukat-e-aKHbar thi main tha

wahan kuchh log the ilzam the baqi andhera hai

bas itna yaad hai jallad tha talwar thi main tha

jahan taswir banwane ki KHatir log aate the

wahan pas-manzar-e-taswir jo diwar thi main tha

main apna sar na karta pesh ujrat mein to kya karta

tumhaari baat thi wo bhi sar-e-bazar thi main tha

ye viran surKH sayyare inhen dekhun to lagta hai

teri duniya mein jo chahkar thi mahkar thi main tha

KHafa mat ho mere badle wahan gul-dan rakh dena

tere kamre ki chizon mein jo shai bekar thi main tha

tumhaare KHat jo main ne KHud ko Dale the nahin pahunche

tu anjaane mein jis ke pyar se do-chaar thi main tha

mere khaliyan the dahqan the taqdir thi tu tha

tera zindan tha zanjir thi jhankar thi main tha