humne rakkha tha jise apni kahani mein kahin

ham ne rakkhā thā jise apnī kahānī meñ kahīñ

ab vo tahrīr hai aurāq-e-ḳhizānī meñ kahīñ

bas ye ik sā.at-e-hijrāñ hai ki jaatī hī nahīñ

koī Thahrā bhī hai is ālam-e-fānī meñ kahīñ

jitnā sāmāñ bhī ikaTThā kiyā is ghar ke liye

bhuul jā.eñge use naql-e-makānī meñ kahīñ

ḳhair auroñ kā to kyā zikr ki ab lagtā hai

tū bhī shāmil hai mire ranj-e-zamānī meñ kahīñ

chashm-e-namnāk ko is darja haqārat se na dekh

tujh ko mil jaanā hai ik din isī paanī meñ kahīñ

markaz-e-jāñ to vahī tū hai magar tere sivā

log haiñ aur bhī is yaad purānī meñ kahīñ

jashn-e-mātam bhī hai raunaq sī tamāshā.ī ko

koī naġhma bhī hai is marsiya-ḳhvānī meñ kahīñ

aaj ke din meñ kisī aur hī din kī hai jhalak

shaam hai aur hī is shaam suhānī meñ kahīñ

kyā samajh aa.e kisī ko mujhe mālūm bhī hai

baat kar jaatā huuñ maiñ apnī ravānī meñ kahīñ

hum ne rakkha tha jise apni kahani mein kahin

ab wo tahrir hai auraq-e-KHizani mein kahin

bas ye ek saat-e-hijran hai ki jati hi nahin

koi Thahra bhi hai is aalam-e-fani mein kahin

jitna saman bhi ikaTTha kiya is ghar ke liye

bhul jaenge use naql-e-makani mein kahin

KHair auron ka to kya zikr ki ab lagta hai

tu bhi shamil hai mere ranj-e-zamani mein kahin

chashm-e-namnak ko is darja haqarat se na dekh

tujh ko mil jaana hai ek din isi pani mein kahin

markaz-e-jaan to wahi tu hai magar tere siwa

log hain aur bhi is yaad purani mein kahin

jashn-e-matam bhi hai raunaq si tamashai ko

koi naghma bhi hai is marsiya-KHwani mein kahin

aaj ke din mein kisi aur hi din ki hai jhalak

sham hai aur hi is sham suhani mein kahin

kya samajh aae kisi ko mujhe malum bhi hai

baat kar jata hun main apni rawani mein kahin