hum tujhe DhunDne niklen to zamane lag jaen

ham tujhe DhūñDne nikleñ to zamāne lag jaa.eñ

ye na ho phir se vahī rog purāne lag jaa.eñ

jumbish-e-dast to qaabū meñ mire hai lekin

kyā kareñ yaar jo nazroñ se pilāne lag jaa.eñ

maiñ kamāñ khīñch ke baiThā huuñ na jaane kab se

aañkh se aañkh mile aur nishāne lag jaa.eñ

ham se nārāzgī terī nahīñ dekhī jaatī

tū ḳhafā ho ke jo baiThe to manāne lag jaa.eñ

nāsehā pūchhte phirte haiñ sabab uljhan kā

'ishq gar ḳhud ye kareñ hosh Thikāne lag jaa.eñ

mausam-e-garmā kī aamad mire sahrāoñ meñ 'kaif'

'ain mumkin hai daraḳhtoñ pe ḳhazāne lag jaa.eñ

hum tujhe DhunDne niklen to zamane lag jaen

ye na ho phir se wahi rog purane lag jaen

jumbish-e-dast to qabu mein mere hai lekin

kya karen yar jo nazron se pilane lag jaen

main kaman khinch ke baiTha hun na jaane kab se

aankh se aankh mile aur nishane lag jaen

hum se naraazgi teri nahin dekhi jati

tu KHafa ho ke jo baiThe to manane lag jaen

naseha puchhte phirte hain sabab uljhan ka

'ishq gar KHud ye karen hosh Thikane lag jaen

mausam-e-garma ki aamad mere sahraon mein 'kaif'

'ain mumkin hai daraKHton pe KHazane lag jaen