jab chaha iqrar kiya hai jab chaha inkar kiya

jab chāhā iqrār kiyā hai jab chāhā inkār kiyā

dekho ham ne ḳhud hī se ye kaisā anokhā pyaar kiyā

aisā anokhā aisā tīkhā jis ko koī sah na sake

ham samjhe pattī pattī ko ham ne hī sarshār kiyā

ruup anokhe mere haiñ aur ruup ye tū ne dekhe haiñ

maiñ ne chāhā kar bhī dikhāyā yā jañgal gulzār kiyā

dard to hotā hī rahtā hai dard ke din hī pyāre haiñ

jaise tez chhurī ko ham ne rah rah kar phir dhaar kiyā

kaale chehre kaalī ḳhushbū sab ko ham ne dekhā hai

apnī āñkhoñ se un ko sharminda har ik baar kiyā

rote dil hañste chehroñ ko koī bhī na dekh sakā

aañsū pī lene kā va.ada haañ sab ne har baar kiyā

kahne jaisī baat nahīñ hai baat to bilkul saada hai

dil hī par qurbān hue aur dil hī ko bīmār kiyā

shīshe TuuTe yā dil TuuTe ḳhushk laboñ par maut liye

jo koī bhī kar na sakā vo ham ne āḳhir-kār kiyā

'nāz' tire zaḳhmī hāthoñ ne jo bhī kiyā achchhā hī kiyā

tū ne sab kī maañg sajā.ī har ik kā siñgār kiyā

jab chaha iqrar kiya hai jab chaha inkar kiya

dekho hum ne KHud hi se ye kaisa anokha pyar kiya

aisa anokha aisa tikha jis ko koi sah na sake

hum samjhe patti patti ko hum ne hi sarshaar kiya

rup anokhe mere hain aur rup ye tu ne dekhe hain

main ne chaha kar bhi dikhaya ya jangal gulzar kiya

dard to hota hi rahta hai dard ke din hi pyare hain

jaise tez chhuri ko hum ne rah rah kar phir dhaar kiya

kale chehre kali KHushbu sab ko hum ne dekha hai

apni aankhon se un ko sharminda har ek bar kiya

rote dil hanste chehron ko koi bhi na dekh saka

aansu pi lene ka wada han sab ne har bar kiya

kahne jaisi baat nahin hai baat to bilkul sada hai

dil hi par qurban hue aur dil hi ko bimar kiya

shishe TuTe ya dil TuTe KHushk labon par maut liye

jo koi bhi kar na saka wo hum ne aaKHir-kar kiya

'naz' tere zaKHmi hathon ne jo bhi kiya achchha hi kiya

tu ne sab ki mang sajai har ek ka singar kiya