کب سے ہے انتظار آ جاؤ

کب سے ہے انتظار آ جاؤ

کم سے کم ایک بار آ جاؤ

پھر یہ دن لوٹ کر نہ آئیں گے

جا رہی ہے بہار آ جاؤ

میرے چاروں طرف ہے تنہائی

توڑ کر یے حصار آ جاؤ

میرے گھر کے تمام دروازے

تم سے کرتے ہیں پیار آ جاؤ

بھیڑ کم ہو رہی ہے لوگوں کی

چھٹ رہا ہے غبار آ جاؤ

ان دنوں اتفاق سے میرا

وقت ہے سازگار آ جاؤ

چاہئے آدمی کو دنیا میں

اک نہ اک غم گسار آ جاؤ

اگر آنے کا اختیار نہیں

آؤ بے اختیار آ جاؤ

بیٹھے بیٹھے یہ چاہتا ہے شعورؔ

تم ہوا پر سوار آ جاؤ