kahin par subh rakhta hun kahin par sham rakhta hun

kahīñ par sub.h rakhtā huuñ kahīñ par shaam rakhtā huuñ

phir is be-rabt se ḳhāke meñ ḳhud se kaam rakhtā huuñ

salīqe se maiñ us kī guftugū kā lutf letā huuñ

aur us ke rū-ba-rū dil meñ ḳhayāl-e-ḳhām rakhtā huuñ

ba-zāhir mad.h se us kī kabhī thaktā nahīñ lekin

darūn-e-ḳhāna-e-dil ḳhvāhish-e-dushnām rakhtā huuñ

ḳhush aa.ī hai abhī to qaid-e-ḳhvāhish is ḳharābe meñ

abhī ḳhud ko rahīn-e-gardish-e-ayyām rakhtā huuñ

safar kī sub.h meñ ranj-e-safar kī dhuul uḌtī hai

had-e-āġhāz meñ andesha-e-anjām rakhtā huuñ

firāq o vasl se haT kar koī rishta hamārā hai

ki us ko chhoḌ paatā huuñ na us ko thaam rakhtā huuñ

dalīl-e-ḳhvāb-e-mastī hai tirī āmādgī imshab

magar is shab meñ tujh se aur koī kaam rakhtā huuñ

tajāvuz se bhalā kab tak guzar auqāt mumkin thī

so apne ḳhuun tak shor-e-dil-e-badnām rakhtā huuñ

kahin par subh rakhta hun kahin par sham rakhta hun

phir is be-rabt se KHake mein KHud se kaam rakhta hun

saliqe se main us ki guftugu ka lutf leta hun

aur us ke ru-ba-ru dil mein KHayal-e-KHam rakhta hun

ba-zahir madh se us ki kabhi thakta nahin lekin

darun-e-KHana-e-dil KHwahish-e-dushnam rakhta hun

KHush aai hai abhi to qaid-e-KHwahish is KHarabe mein

abhi KHud ko rahin-e-gardish-e-ayyam rakhta hun

safar ki subh mein ranj-e-safar ki dhul uDti hai

had-e-aghaz mein andesha-e-anjam rakhta hun

firaq o wasl se haT kar koi rishta hamara hai

ki us ko chhoD pata hun na us ko tham rakhta hun

dalil-e-KHwab-e-masti hai teri aamadgi imshab

magar is shab mein tujh se aur koi kaam rakhta hun

tajawuz se bhala kab tak guzar auqat mumkin thi

so apne KHun tak shor-e-dil-e-badnam rakhta hun