کل رات وہ جھگڑتی رہی بات بات پر

کل رات وہ جھگڑتی رہی بات بات پر

اور میں کتاب لکھتا رہا کائنات پر

کیا سوچیے کہ سوچ سے آگے ہے زندگی

پہرے لگا رکھے ہیں کسی نے حیات پر

کیا داستاں سنائیے اس کے وصال کی

کیا تبصرہ کرے کوئی صحرا کی رات پر

شاید میری انا مرے لہجے پہ ہے محیط

شک ہو رہا ہے اس کو مرے التفات پر

تیرے بغیر لگتا ہے گویا یہ زندگی

تنقید کر رہی ہے میری خواہشات پر

پھر اس نے میری خو میں مجھے قید کر دیا

اک خواب سا لپیٹ دیا میری ذات پر