khaya piya kuchh nahin

hotel meñ kal ga.e to ye sochā ki khā.eñ kyā

begam se ham ne pūchhā ki boleñ mañgā.eñ kyā

bolīñ sikhāne ke liye kyā ye kanīz hai

hotel meñ aa ga.e haiñ magar kuchh tamīz hai

hotel kā ehtirām kareñ kuchh adab kareñ

lāzim hai sab se pahle to menu talab kareñ

uñglī ke ik ishāre se waiter bhī aa gayā

menu jo haath meñ thā vo mujh ko thamā gayā

menu ko apne sāmne phir maiñ ne rakh liyā

begam ne itnī der meñ ketchup haḌap kiyā

chashma lagā ke menu ko jab ġhaur se paḌhā

har ek shai kā daam mujhe to lagā chaḌhā

begam ko paḌh ke menu sunānā thā lāzmī

ye silsila chalānā thā aage hañsī-ḳhushī

pūchhā shurūa salād se ham kar leñ bhāgvān

bolīñ kachar-kachar se pakā.eñge mere kaan

maiñ ne kiyā jo dāl-fry kā kuchh bayāñ

bolīñ ki maiñ to aap se ḳhāsī thī ḳhush-gumāñ

thoḌī bahut karele se raġhbat hai aap ko

kahne lagīñ ki sūjhī sharārat hai aap ko

jab ye kahā ki bhinDī yahāñ kī lazīz hai

bolīñ bhalā batāo vo khāne kī chiiz hai

phir maiñ ne zikr chheḌā jo pālak-panīr kā

taḌpīñ vo jaise sher paḌhā maiñ ne 'mīr' kā

bolīñ ki jānte nahīñ tibbī muāmlāt

phathrī kā ḳhauf rahtā hai khāne se saag paat

maiñ ne kahā ki gobhī maTar khā ke dekh leñ

bolīñ ki aisī chīzoñ se parhez hī kareñ

biryānī kā jo zikr kiyā ehtimām se

tan-man meñ un ke aag lagī is kalām se

farmāyā ho chikan kī mutton kī yā beef kī

tārīf mat karo kisī jins-e-latīf kī

maiñ ne kahā yahāñ hai bihārī kabāb bhī

bolīñ ki beef kartā hai me.ada ḳharāb bhī

bolīñ nalī nahārī kā sun kar hai lā-javāb

cholesterol baḌhtā hai lekin mire janāb

maiñ ne kahā kaḌāhī mutton aur chikan kī hai

ḳhurāk āj-kal yahī har mard-o-zan kī hai

bolīñ ki mirch tez na ho to maza nahīñ

aur tez mirch khāne kā ab hausla nahīñ

pūchhā batā.iye to sahī donoñ khā.eñ kyā

menu paḌā hai sāmne boleñ mañgā.eñ kyā

bolīñ uTheñ yahāñ se mirā hai ye mashvara

chalte haiñ chal ke khāte haiñ burger kisī jagah

hotel mein kal gae to ye socha ki khaen kya

begam se hum ne puchha ki bolen mangaen kya

bolin sikhane ke liye kya ye kaniz hai

hotel mein aa gae hain magar kuchh tamiz hai

hotel ka ehtiram karen kuchh adab karen

lazim hai sab se pahle to meinu talab karen

ungli ke ek ishaare se waiter bhi aa gaya

meinu jo hath mein tha wo mujh ko thama gaya

meinu ko apne samne phir main ne rakh liya

begam ne itni der mein ketchup haDap kiya

chashma laga ke meinu ko jab ghaur se paDha

har ek shai ka dam mujhe to laga chaDha

begam ko paDh ke meinu sunana tha lazmi

ye silsila chalana tha aage hansi-KHushi

puchha shurua salad se hum kar len bhagwan

bolin kachar-kachar se pakaenge mere kan

main ne kiya jo dal-fry ka kuchh bayan

bolin ki main to aap se KHasi thi KHush-guman

thoDi bahut karele se raghbat hai aap ko

kahne lagin ki sujhi shararat hai aap ko

jab ye kaha ki bhinDi yahan ki laziz hai

bolin bhala batao wo khane ki chiz hai

phir main ne zikr chheDa jo palak-panir ka

taDpin wo jaise sher paDha main ne 'mir' ka

bolin ki jaante nahin tibbi muamlat

phathri ka KHauf rahta hai khane se sag pat

main ne kaha ki gobhi maTar kha ke dekh len

bolin ki aisi chizon se parhez hi karen

biryani ka jo zikr kiya ehtimam se

tan-man mein un ke aag lagi is kalam se

farmaya ho chikan ki mutton ki ya beef ki

tarif mat karo kisi jins-e-latif ki

main ne kaha yahan hai bihaari kabab bhi

bolin ki beef karta hai meada KHarab bhi

bolin nali nahaari ka sun kar hai la-jawab

cholesterol baDhta hai lekin mere janab

main ne kaha kaDahi mutton aur chikan ki hai

KHurak aaj-kal yahi har mard-o-zan ki hai

bolin ki mirch tez na ho to maza nahin

aur tez mirch khane ka ab hausla nahin

puchha bataiye to sahi donon khaen kya

meinu paDa hai samne bolen mangaen kya

bolin uThen yahan se mera hai ye mashwara

chalte hain chal ke khate hain burger kisi jagah