kis ja na be-qarari se main KHasta-tan gaya

kis jā na be-qarārī se maiñ ḳhasta-tan gayā

par dekhne kā us ke kahīñ Dhab na ban gayā

kis kis tarah kī kī ḳhafagī dil ne mujh se aah

rūThā kisī kā yaar kisī se jo man gayā

yaaro jahāñ meñ ab kahīñ dekhī vafā kī chaal

jaane do ye na zikr karo vo chalan gayā

sausan zabāñ nikāle jo niklī to zer-e-ḳhāk

kyā jāniye ki kaun ye tishna-dahan gayā

ai ishq sach to ye hai ki shīrīñ ne kuchh na kī

hasrat kā koh dil pe liye kohkan gayā

bas nāsehā ye tīr-e-malāmat kahāñ talak

bātoñ se terī aah kalejā to chhan gayā

kal us sanam ke kūche se niklā jo shaiḳh-e-vaqt

kahte the sab idhar se ajab barhaman gayā

paidā ye hijr-e-yār meñ vahshat huī ki aah

is dil kā vasl meñ bhī na dīvāna-pan gayā

hairāñ hai tujh ko dekh ke 'jur.at' mirī to aql

do chaar din meñ kyā ye tirā haal ban gayā

kis ja na be-qarari se main KHasta-tan gaya

par dekhne ka us ke kahin Dhab na ban gaya

kis kis tarah ki ki KHafagi dil ne mujh se aah

ruTha kisi ka yar kisi se jo man gaya

yaro jahan mein ab kahin dekhi wafa ki chaal

jaane do ye na zikr karo wo chalan gaya

sausan zaban nikale jo nikli to zer-e-KHak

kya jaaniye ki kaun ye tishna-dahan gaya

ai ishq sach to ye hai ki shirin ne kuchh na ki

hasrat ka koh dil pe liye kohkan gaya

bas naseha ye tir-e-malamat kahan talak

baaton se teri aah kaleja to chhan gaya

kal us sanam ke kuche se nikla jo shaiKH-e-waqt

kahte the sab idhar se ajab barhaman gaya

paida ye hijr-e-yar mein wahshat hui ki aah

is dil ka wasl mein bhi na diwana-pan gaya

hairan hai tujh ko dekh ke 'jurat' meri to aql

do chaar din mein kya ye tera haal ban gaya