koi Takra ke subuk-sar bhi to ho sakta hai

koī Takrā ke subuk-sar bhī to ho saktā hai

merī ta.amīr meñ patthar bhī to ho saktā hai

kyuuñ na ai shaḳhs tujhe haath lagā kar dekhūñ

tū mire vahm se baḌh kar bhī to ho saktā hai

tū hī tū hai to phir ab jumla jamāl-e-duniyā

terā shak aur kisī par bhī to ho saktā hai

ye jo hai phuul hathelī pe ise phuul na jaan

merā dil jism se bāhar bhī to ho saktā hai

shāḳh par baiThe parinde ko uḌāne vaale

peḌ ke haath meñ patthar bhī to ho saktā hai

kyā zarūrī hai ki bāhar hī numū ho merī

merā khilnā mire andar bhī to ho saktā hai

ye jo hai ret kā Tiila mire qadmoñ ke tale

koī dam meñ mire uupar bhī to ho saktā hai

kyā zarūrī hai ki ham haar ke jīteñ 'tābish'

ishq kā khel barābar bhī to ho saktā hai

koi Takra ke subuk-sar bhi to ho sakta hai

meri tamir mein patthar bhi to ho sakta hai

kyun na ai shaKHs tujhe hath laga kar dekhun

tu mere wahm se baDh kar bhi to ho sakta hai

tu hi tu hai to phir ab jumla jamal-e-duniya

tera shak aur kisi par bhi to ho sakta hai

ye jo hai phul hatheli pe ise phul na jaan

mera dil jism se bahar bhi to ho sakta hai

shaKH par baiThe parinde ko uDane wale

peD ke hath mein patthar bhi to ho sakta hai

kya zaruri hai ki bahar hi numu ho meri

mera khilna mere andar bhi to ho sakta hai

ye jo hai ret ka Tila mere qadmon ke tale

koi dam mein mere upar bhi to ho sakta hai

kya zaruri hai ki hum haar ke jiten 'tabish'

ishq ka khel barabar bhi to ho sakta hai