main use sochta raha yani

maiñ use sochtā rahā ya.anī

vo mirā ḳhvāb hai ḳhudā ya.anī

hijr se hijr tak thī ye hijrat

vo milā ya.anī kho gayā ya.anī

gardish-e-mehr-o-māh kā hāsil

ya.anī merā vajūd lā-yānī

dil kahāñ shahsavār-e-duniyā thā

so girā gir ke mar gayā ya.anī

to mujhe us kā naam bhuul gayā

ho gayā maiñ bhī lāpatā ya.anī

kaam kī baat pūchhte kyā ho

kuchh huā kuchh nahīñ huā ya.anī

chalte rahiye to suukh jā.egā

ye samundar ye aabla ya.anī

ya.anī tum se to maiñ milā hī nahīñ

vo koī aur shaḳhs thā ya.anī

koī āvāz TūTne kī nahīñ

dil meñ ik baat hai ḳhalā ya.anī

us ko ḳhush dekh kar vahāñ 'bābar'

maiñ bhī ḳhush thā udaas thā ya.anī

main use sochta raha yani

wo mera KHwab hai KHuda yani

hijr se hijr tak thi ye hijrat

wo mila yani kho gaya yani

gardish-e-mehr-o-mah ka hasil

yani mera wajud la-yani

dil kahan shahsawar-e-duniya tha

so gira gir ke mar gaya yani

to mujhe us ka nam bhul gaya

ho gaya main bhi lapata yani

kaam ki baat puchhte kya ho

kuchh hua kuchh nahin hua yani

chalte rahiye to sukh jaega

ye samundar ye aabla yani

yani tum se to main mila hi nahin

wo koi aur shaKHs tha yani

koi aawaz TuTne ki nahin

dil mein ek baat hai KHala yani

us ko KHush dekh kar wahan 'babar'

main bhi KHush tha udas tha yani