misr se rit chali aati hai takrar ke sath

misr se riit chalī aatī hai takrār ke saath

husn kā naam liyā jaatā hai bāzār ke saath

kaun kāfir hai jo khelegā diyānat se yahāñ

jab mirī jiit hai vābasta tirī haar ke saath

ham tire shahr meñ bikne ke liye aa.e haiñ

ham ko matlab hai faqat apne ḳharīdār ke saath

tū ne dekhā hī nahīñ mo.ajiza-e-husn-e-lahn

titliyāñ kaise kathak kartī haiñ malhār ke saath

bāñdh rakkhā hai mujhe ishq kī zanjīr ke saath

aur ḳhud sāmne hai husn kī talvār ke saath

rahnumāoñ se kiyā jaa.e magar aisā sulūk

jaisā bartāv kiyā jaatā hai ġhaddār ke saath

ta.ana mat de tū mujhe mere gunāhoñ kā faqīh

mo.āmla hai mirā sattār ke ġhaffār ke saath

bol uThte haiñ dar-o-bām farishtoñ kī zabāñ

jaane kyā ramz hai iktāre kī ik taar ke saath

nā-ḳhudā.ī kā ye andāz adā hai ki bharam

bāñdh kar pheñk diyā bahr meñ patvār ke saath

aisī do-ātisha lazzat ki baqā pā jā.ūñ

jām-e-kausar jo atā ho tire dīdār ke saath

merā mahbūb suḳhanvar hai par aisā vaisā

baat kartā hai ishāre meñ bhī me.aar ke saath

sach kahe pī ke faqat sach ke sivā kuchh na kahe

guftugū kī hai kabhī aap ne mai-ḳhvār ke saath

tū ne dekhā hī nahīñ faqr kā 'āzād' ġhurūr

baat karnī bhī baḌā kaam hai ḳhud.dār ke saath

misr se rit chali aati hai takrar ke sath

husn ka nam liya jata hai bazar ke sath

kaun kafir hai jo khelega diyanat se yahan

jab meri jit hai wabasta teri haar ke sath

hum tere shahr mein bikne ke liye aae hain

hum ko matlab hai faqat apne KHaridar ke sath

tu ne dekha hi nahin moajiza-e-husn-e-lahn

titliyan kaise kathak karti hain malhaar ke sath

bandh rakkha hai mujhe ishq ki zanjir ke sath

aur KHud samne hai husn ki talwar ke sath

rahnumaon se kiya jae magar aisa suluk

jaisa bartaw kiya jata hai ghaddar ke sath

tana mat de tu mujhe mere gunahon ka faqih

moamla hai mera sattar ke ghaffar ke sath

bol uThte hain dar-o-baam farishton ki zaban

jaane kya ramz hai iktare ki ek tar ke sath

na-KHudai ka ye andaz ada hai ki bharam

bandh kar phenk diya bahr mein patwar ke sath

aisi do-atisha lazzat ki baqa pa jaun

jam-e-kausar jo ata ho tere didar ke sath

mera mahbub suKHanwar hai par aisa waisa

baat karta hai ishaare mein bhi mear ke sath

sach kahe pi ke faqat sach ke siwa kuchh na kahe

guftugu ki hai kabhi aap ne mai-KHwar ke sath

tu ne dekha hi nahin faqr ka 'azad' ghurur

baat karni bhi baDa kaam hai KHuddar ke sath