raaz jo sina-e-fitrat mein nihan hota hai

raaz jo sīna-e-fitrat meñ nihāñ hotā hai

sab se pahle dil-e-shā.ir pe ayaañ hotā hai

saḳht ḳhūñ-rez jab āshob-e-jahāñ hotā hai

nahīñ mālūm ye insān kahāñ hotā hai

jab koī hādsa-e-kaun-o-makāñ hotā hai

zarra zarra merī jānib nigarāñ hotā hai

jo nazar-karda-e-sāhab-nazrāñ hotā hai

usī dīvāne ke qadmoñ pe jahāñ hotā hai

jab koī ishq meñ barbād-e-jahāñ hotā hai

mujh ko mahsūs ḳhud apnā hī ziyāñ hotā hai

mutazalzal hai adab-gāh-e-mohabbat kī zamīñ

koī dekhe to ye hañgāma kahāñ hotā hai

kahīñ aisā to nahīñ vo bhī ho koī āzār

tujh ko jis chiiz pe rāhat kā gumāñ hotā hai

dil ġhanī ho to har ik ranj bhī dil kī rāhat

zehn muflis ho to har suud ziyāñ hotā hai

imtihāñ-gāh-e-mohabbat meñ na rakkhe vo qadam

maut ke naam se jis ko ḳhafaqāñ hotā hai

yahī vo manzil-e-dushvār hai jis manzil meñ

ḳhatm har marhala-e-sūd-o-ziyāñ hotā hai

har qadam mārka-e-karb-o-balā hai darpesh

har nafas sāneha-e-marg-e-javāñ hotā hai

naaz jis ḳhāk-e-vatan par thā mujhe aah 'jigar'

usī jannat pe jahannam kā gumāñ hotā hai

raaz jo sina-e-fitrat mein nihan hota hai

sab se pahle dil-e-shair pe ayan hota hai

saKHt KHun-rez jab aashob-e-jahan hota hai

nahin malum ye insan kahan hota hai

jab koi hadsa-e-kaun-o-makan hota hai

zarra zarra meri jaanib nigaran hota hai

jo nazar-karda-e-sahab-nazran hota hai

usi diwane ke qadmon pe jahan hota hai

jab koi ishq mein barbaad-e-jahan hota hai

mujh ko mahsus KHud apna hi ziyan hota hai

mutazalzal hai adab-gah-e-mohabbat ki zamin

koi dekhe to ye hangama kahan hota hai

kahin aisa to nahin wo bhi ho koi aazar

tujh ko jis chiz pe rahat ka guman hota hai

dil ghani ho to har ek ranj bhi dil ki rahat

zehn muflis ho to har sud ziyan hota hai

imtihan-gah-e-mohabbat mein na rakkhe wo qadam

maut ke nam se jis ko KHafaqan hota hai

yahi wo manzil-e-dushwar hai jis manzil mein

KHatm har marhala-e-sud-o-ziyan hota hai

har qadam marka-e-karb-o-bala hai darpesh

har nafas saneha-e-marg-e-jawan hota hai

naz jis KHak-e-watan par tha mujhe aah 'jigar'

usi jannat pe jahannam ka guman hota hai