na dil mein sabr na ab dida-e-pur-ab mein KHwab

na dil meñ sabr na ab dīda-e-pur-āb meñ ḳhvāb

shitāb aa ki hameñ aave is azaab meñ ḳhvāb

jahāñ bhī ḳhvāb hai aur ham bhī ḳhvāb haiñ ai dil

ajab bahār kā dekhā ye ham ne ḳhvāb meñ ḳhvāb

hamārī chashm kā ai shahsavār tausan-e-nāz

jo ġhaur kī to kiyā hai tirī rikāb meñ ḳhvāb

har ik makāñ meñ guzargāh-e-ḳhvāb hai lekin

agar nahīñ to nahīñ ishq ke janāb meñ ḳhvāb

hujūm-e-ashk meñ lagtī hai chashm-e-tar is taur

ki jaise maahī ko aatā hai apne aab meñ ḳhvāb

ravā-ravī meñ lage aañkh kis tarah se 'nazīr'

musāfiroñ ko kahāñ aise iztirāb meñ ḳhvāb

na dil mein sabr na ab dida-e-pur-ab mein KHwab

shitab aa ki hamein aawe is azab mein KHwab

jahan bhi KHwab hai aur hum bhi KHwab hain ai dil

ajab bahaar ka dekha ye hum ne KHwab mein KHwab

hamari chashm ka ai shahsawar tausan-e-naz

jo ghaur ki to kiya hai teri rikab mein KHwab

har ek makan mein guzargah-e-KHwab hai lekin

agar nahin to nahin ishq ke janab mein KHwab

hujum-e-ashk mein lagti hai chashm-e-tar is taur

ki jaise mahi ko aata hai apne aab mein KHwab

rawa-rawi mein lage aankh kis tarah se 'nazir'

musafiron ko kahan aise iztirab mein KHwab