ret ki lahron se dariya ki rawani mange

ret kī lahroñ se dariyā kī ravānī māñge

maiñ vo pyāsā huuñ jo sahrāoñ se paanī māñge

tū vo ḳhud-sar ki ulajh jaatā hai ā.īnoñ se

maiñ vo sarkash ki jo tujh se tirā saanī māñge

vo bhī dhartī pe utārī huī maḳhlūq hī hai

jis kā kaaTā huā insān na paanī māñge

abr to abr shajar bhī haiñ havā kī zad meñ

kis se dam bhar ko koī chhāñv suhānī māñge

uḌte pattoñ pe lapaktī hai yuuñ Daalī Daalī

jaise jaate hue mausam kī nishānī māñge

maiñ vo bhūlā huā chehra huuñ ki ā.īna bhī

mujh se merī koī pahchān purānī māñge

zard malbūs meñ aatī haiñ bahāreñ 'shāhid'

aur tū rañg ḳhizāoñ kā bhī dhānī māñge

ret ki lahron se dariya ki rawani mange

main wo pyasa hun jo sahraon se pani mange

tu wo KHud-sar ki ulajh jata hai aainon se

main wo sarkash ki jo tujh se tera sani mange

wo bhi dharti pe utari hui maKHluq hi hai

jis ka kaTa hua insan na pani mange

abr to abr shajar bhi hain hawa ki zad mein

kis se dam bhar ko koi chhanw suhani mange

uDte patton pe lapakti hai yun Dali Dali

jaise jate hue mausam ki nishani mange

main wo bhula hua chehra hun ki aaina bhi

mujh se meri koi pahchan purani mange

zard malbus mein aati hain bahaaren 'shahid'

aur tu rang KHizaon ka bhi dhani mange