sans ki aanch zara tez karo

saañs kī aañch zarā tez karo

kāñch kā jism pighal jaane do

laam ḳhālī hai use mat chheḌo

nuun ke peT meñ nuqta dekho

raat ke parde ulaTte jaao

chāñd kā jism barahna bhī ho

sar uThāo na kanār-e-dariyā

mauj ko sar se guzar jaane do

ḳhud-ba-ḳhud shāḳh lachak jā.egī

phal se bharpūr to ho lene do

aañkh khulte hī ye āvāz aa.ī

chor ghus aayā hai ghar meñ pakḌo

uñgliyāñ chāTte rah jāoge

tum kabhī apnā lahū chakh dekho

maut saḌkoñ pe phirā kartī hai

ghar se niklo to sambhal kar niklo

kaun ab sher kahe nazm likhe

shahr hī chhoḌ ga.ī jab zebo

tum ko da.avā hai suḳhan-fahmī kā

jaao 'ġhālib' ke taraf-dār bano

kal vo 'ādil' se ye farmāte the

shā.erī chhoḌ ke shādī kar lo

sans ki aanch zara tez karo

kanch ka jism pighal jaane do

lam KHali hai use mat chheDo

nun ke peT mein nuqta dekho

raat ke parde ulaTte jao

chand ka jism barahna bhi ho

sar uThao na kanar-e-dariya

mauj ko sar se guzar jaane do

KHud-ba-KHud shaKH lachak jaegi

phal se bharpur to ho lene do

aankh khulte hi ye aawaz aai

chor ghus aaya hai ghar mein pakDo

ungliyan chaTte rah jaoge

tum kabhi apna lahu chakh dekho

maut saDkon pe phira karti hai

ghar se niklo to sambhal kar niklo

kaun ab sher kahe nazm likhe

shahr hi chhoD gai jab zebo

tum ko dawa hai suKHan-fahmi ka

jao 'ghaalib' ke taraf-dar bano

kal wo 'adil' se ye farmate the

shaeri chhoD ke shadi kar lo