samundaron ko bhi dariya samajh rahe hain hum

samundaroñ ko bhī dariyā samajh rahe haiñ ham

ye apne-āp ko ab kyā samajh rahe haiñ ham

hamārī raah meñ haa.el jo ik añdherā hai

use bhī apnā hī saaya samajh rahe haiñ ham

yahīñ talak hai rasā.ī hamārī āñkhoñ kī

ki ḳhadd-o-ḳhāl ko chehra samajh rahe haiñ ham

hamārī baat kisī kī samajh meñ kyuuñ aatī

ḳhud apnī baat ko kitnā samajh rahe haiñ ham

ab apne dard ko sahnā bahut hī mushkil hai

zarā hai zaḳhm ko gahrā samajh rahe haiñ ham

abhī fuzūl hai manzil kī baat bhī karnā

abhī to logoñ se rastā samajh rahe haiñ ham

bas ek raat Thaharne kā ye natīja hai

sarā-e-fānī ko duniyā samajh rahe haiñ ham

samundaron ko bhi dariya samajh rahe hain hum

ye apne-ap ko ab kya samajh rahe hain hum

hamari rah mein hael jo ek andhera hai

use bhi apna hi saya samajh rahe hain hum

yahin talak hai rasai hamari aankhon ki

ki KHadd-o-KHal ko chehra samajh rahe hain hum

hamari baat kisi ki samajh mein kyun aati

KHud apni baat ko kitna samajh rahe hain hum

ab apne dard ko sahna bahut hi mushkil hai

zara hai zaKHm ko gahra samajh rahe hain hum

abhi fuzul hai manzil ki baat bhi karna

abhi to logon se rasta samajh rahe hain hum

bas ek raat Thaharne ka ye natija hai

sara-e-fani ko duniya samajh rahe hain hum