sitam wo tumne kiye bhule hum gila dil ka

sitam vo tum ne kiye bhūle ham gila dil kā

huā tumhāre bigaḌne se faisla dil kā

bahār aate hī kunj-e-qafas nasīb huā

hazār haif ki niklā na hausla dil kā

chalā hai chhoḌ ke tanhā kidhar tasavvur-e-yār

shab-e-firāq meñ tujh se thā mashġhala dil kā

vo riñd huuñ ki mujhe hatkaḌī se bai.at hai

milā hai gesū-e-jānāñ se silsila dil kā

vo zulm karte haiñ ham par to log kahte haiñ

ḳhudā bure se na Daale muāmla dil kā

hazār fasl-e-gul aa.e junūñ! vo josh kahāñ

gayā shabāb ke ham-rāh valvala dil kā

ḳhudā ke haath hai ab apnā ai 'qalaq' insāf

butoñ se hashr meñ hogā muāmla dil kā

sitam wo tum ne kiye bhule hum gila dil ka

hua tumhaare bigaDne se faisla dil ka

bahaar aate hi kunj-e-qafas nasib hua

hazar haif ki nikla na hausla dil ka

chala hai chhoD ke tanha kidhar tasawwur-e-yar

shab-e-firaq mein tujh se tha mashghala dil ka

wo rind hun ki mujhe hatkaDi se baiat hai

mila hai gesu-e-jaanan se silsila dil ka

wo zulm karte hain hum par to log kahte hain

KHuda bure se na Dale muamla dil ka

hazar fasl-e-gul aae junun! wo josh kahan

gaya shabab ke ham-rah walwala dil ka

KHuda ke hath hai ab apna ai 'qalaq' insaf

buton se hashr mein hoga muamla dil ka