tah mein jo rah gae wo sadaf bhi nikaliye

tah meñ jo rah ga.e vo sadaf bhī nikāliye

tuġhyāniyoñ kā haath samundar meñ Dāliye

apnī hadoñ meñ rahiye ki rah jaa.e aabrū

uupar jo dekhnā hai to pagḌī sañbhāliye

ḳhushbū to muddatoñ kī zamīñ-doz ho chukī

ab sirf pattiyoñ ko havā meñ uchhāliye

sadiyoñ kā farq paḌtā hai lamhoñ ke pher meñ

jo ġham hai aaj kā use kal par na Tāliye

aayā hī thā abhī mire lab pe vafā kā naam

kuchh dostoñ ne haath meñ patthar uThā liye

kah do salīb-e-shab se ki apnī manā.e ḳhair

ham ne to phir charāġh saroñ ke jalā liye

duniyā kī nafrateñ mujhe qallāsh kar ga.iiñ

ik pyaar kī nazar mire kaase meñ Dāliye

mahsūs ho rahā hai kuchh aisā mujhe 'qatīl'

nīñdoñ ne jaise aaj kī shab par lagā liye

tah mein jo rah gae wo sadaf bhi nikaliye

tughyaniyon ka hath samundar mein Daliye

apni hadon mein rahiye ki rah jae aabru

upar jo dekhna hai to pagDi sanbhaaliye

KHushbu to muddaton ki zamin-doz ho chuki

ab sirf pattiyon ko hawa mein uchhaaliye

sadiyon ka farq paDta hai lamhon ke pher mein

jo gham hai aaj ka use kal par na Taliye

aaya hi tha abhi mere lab pe wafa ka nam

kuchh doston ne hath mein patthar uTha liye

kah do salib-e-shab se ki apni manae KHair

hum ne to phir charagh saron ke jala liye

duniya ki nafraten mujhe qallash kar gain

ek pyar ki nazar mere kase mein Daliye

mahsus ho raha hai kuchh aisa mujhe 'qatil'

nindon ne jaise aaj ki shab par laga liye