wo mere nale ka shor hi tha shab-e-siyah ki nihayaton mein

vo mere naale kā shor hī thā shab-e-siyah kī nihāyatoñ meñ

maiñ ek zarra ināyatoñ par maiñ ek gardish kasāfatoñ meñ

giraft aur us kī kar rahā huuñ jo aab hai in basāratoñ kī

kamand aur us pe pheñktā huuñ jo tah-e-nashīñ hai samā.atoñ meñ

mire liye shahr-e-kaj meñ rakkhā hī kyā hai jo apne ġham gañvā.ūñ

vo ek dāmāñ bahut hai mujh ko sukūt-afzā farāġhatoñ meñ

maiñ ek shab kitnī rāteñ jaagā vo maah biite ki saal guzre

pahāḌ sā vaqt kāTtā huuñ shumār kartā huuñ sā.atoñ meñ

tire falak hī se TūTne vaalī raushnī ke haiñ aks saare

kahīñ kahīñ jo chamak rahe haiñ hurūf merī ibāratoñ meñ

vo bojh sar par uThā rakhā hai ki jism o jaañ tak haiñ chuur jin se

pachās barsoñ kī zillateñ jo hameñ milī thiiñ virāsatoñ meñ

wo mere nale ka shor hi tha shab-e-siyah ki nihayaton mein

main ek zarra inayaton par main ek gardish kasafaton mein

giraft aur us ki kar raha hun jo aab hai in basaraton ki

kamand aur us pe phenkta hun jo tah-e-nashin hai samaaton mein

mere liye shahr-e-kaj mein rakkha hi kya hai jo apne gham ganwaun

wo ek daman bahut hai mujh ko sukut-afza faraghaton mein

main ek shab kitni raaten jaga wo mah bite ki sal guzre

pahaD sa waqt kaTta hun shumar karta hun saaton mein

tere falak hi se TuTne wali raushni ke hain aks sare

kahin kahin jo chamak rahe hain huruf meri ibaraton mein

wo bojh sar par uTha rakha hai ki jism o jaan tak hain chur jin se

pachas barson ki zillaten jo hamein mili thin wirasaton mein