ye jo alfaz ko mahkar banaya hua hai

ye jo alfāz ko mahkār banāyā huā hai

ek gul kā ye sab asrār banāyā huā hai

soch ko suujh kahāñ hai ki jo kuchh kah paa.e

dil ne kyā kyā pas-e-dīvār banāyā huā hai

pair jaate haiñ ye dariyā-e-shab-o-roz aksar

baaġh ik sair ko us paar banāyā huā hai

shauq-e-dahlīz pe be-tāb khaḌā hai kab se

dard gūñdhe hue haiñ haar banāyā huā hai

ye to apnoñ hī ke charkoñ kī sulag hai varna

dil ne har aag ko gulzār banāyā huā hai

toḌnā hai jo ta.alluq to tazabzub kaisā

shāḳh-e-ehsās pe kyā baar banāyā huā hai

jaañ khapāte haiñ ġham-e-ishq meñ ḳhush ḳhush 'ālī'

kaisī lazzat kā ye āzār banāyā huā hai

ye jo alfaz ko mahkar banaya hua hai

ek gul ka ye sab asrar banaya hua hai

soch ko sujh kahan hai ki jo kuchh kah pae

dil ne kya kya pas-e-diwar banaya hua hai

pair jate hain ye dariya-e-shab-o-roz aksar

bagh ek sair ko us par banaya hua hai

shauq-e-dahliz pe be-tab khaDa hai kab se

dard gundhe hue hain haar banaya hua hai

ye to apnon hi ke charkon ki sulag hai warna

dil ne har aag ko gulzar banaya hua hai

toDna hai jo talluq to tazabzub kaisa

shaKH-e-ehsas pe kya bar banaya hua hai

jaan khapate hain gham-e-ishq mein KHush KHush 'ali'

kaisi lazzat ka ye aazar banaya hua hai