ye saman ye lutf ye dil-chasp manzar dekh kar

ye samāñ ye lutf ye dil-chasp manzar dekh kar

ho ga.e be-ghar hazāroñ aap kā ghar dekh kar

is taraf dil dekh kar aur us taraf sar dekh kar

paañv rakhnā chāhiye tum ko zamīñ par dekh kar

chain kyuuñ aane lagā jalvoñ ko dam bhar dekh kar

pahle dekhūñgā unheñ phir hūñgā muztar dekh kar

kah gayā vo mere ujḌe ghar kā manzar dekh kar

ḳhaak patthar shaad huuñ maiñ ḳhaak patthar dekh kar

allāh allāh is qadar tāsīr-e-saudā-e-bahār

dil kī ik ik rag phaḌak uThtī hai nashtar dekh kar

har ghaḌī mujh ko rahī sūrat parastī hī kī dhun

maiñ huā betāb aksar sun kar aksar dekh kar

hasrat-e-nazzāra mahshar meñ hameñ laa.ī to hai

kyā hamārā haal hogā un ko din bhar dekh kar

qatl kī ab kyā zarūrat ham to yuuñ hī mar ga.e

un ke nāzuk haath meñ chhoTā sā ḳhanjar dekh kar

jo duā dete the jiine kī mujhe vo dost bhī

uTh ga.e bālīñ se merā haal abtar dekh kar

qasd thā ho kar palaT ā.eñge ab Talte nahīñ

paañv phailāne lage ham kū-e-dilbar dekh kar

dil unheñ deñge magar ham deñge in shartoñ ke saath

aazmā kar jāñch kar sun kar samajh kar dekh kar

ek mimbar thā vahāñ do-chār the zarf-e-vazū

ho ga.ī hairat hameñ allāh kā ghar dekh kar

vo samajhte haiñ ye koī tālib-e-dīdār hai

sāya-e-qāmat ko bhī raste meñ aksar dekh kar

dasht se barsoñ meñ laa.ī thī hameñ hubb-e-vatan

aur vahshat baḌh ga.ī ujḌā huā ghar dekh kar

shash-jihat ke ġham se mai-ḳhvāroñ ko chhuTkārā milā

ḳhum subū shīsha surāhī jaam sāġhar dekh kar

dāvar-e-mahshar ko itnī jāñch kī fursat kahāñ

pheñk degā vo mire isyāñ kā daftar dekh kar

but-parastī tak pahuñchtī hai kahāñ nāseh ye baat

ḳhush huā kartā huuñ maiñ ḳhush-rañg patthar dekh kar

ġham mujhe kyā ho ki tanhā mubtalā-e-ġham nahīñ

mutma.in hai dil mirā duniyā ko muztar dekh kar

mere dil meñ aa.e vo apne harīm-e-nāz se

tīsrā ghar ab na dekheñ dūsrā ghar dekh kar

'nūh' is tūfān par kyā abr ko tarjīh duuñ

paanī paanī hai vo josh dīda-e-tar dekh kar

ye saman ye lutf ye dil-chasp manzar dekh kar

ho gae be-ghar hazaron aap ka ghar dekh kar

is taraf dil dekh kar aur us taraf sar dekh kar

panw rakhna chahiye tum ko zamin par dekh kar

chain kyun aane laga jalwon ko dam bhar dekh kar

pahle dekhunga unhen phir hunga muztar dekh kar

kah gaya wo mere ujDe ghar ka manzar dekh kar

KHak patthar shad hun main KHak patthar dekh kar

allah allah is qadar tasir-e-sauda-e-bahaar

dil ki ek ek rag phaDak uThti hai nashtar dekh kar

har ghaDi mujh ko rahi surat parasti hi ki dhun

main hua betab aksar sun kar aksar dekh kar

hasrat-e-nazzara mahshar mein hamein lai to hai

kya hamara haal hoga un ko din bhar dekh kar

qatl ki ab kya zarurat hum to yun hi mar gae

un ke nazuk hath mein chhoTa sa KHanjar dekh kar

jo dua dete the jine ki mujhe wo dost bhi

uTh gae baalin se mera haal abtar dekh kar

qasd tha ho kar palaT aaenge ab Talte nahin

panw phailane lage hum ku-e-dilbar dekh kar

dil unhen denge magar hum denge in sharton ke sath

aazma kar jaanch kar sun kar samajh kar dekh kar

ek mimbar tha wahan do-chaar the zarf-e-wazu

ho gai hairat hamein allah ka ghar dekh kar

wo samajhte hain ye koi talib-e-didar hai

saya-e-qamat ko bhi raste mein aksar dekh kar

dasht se barson mein lai thi hamein hubb-e-watan

aur wahshat baDh gai ujDa hua ghar dekh kar

shash-jihat ke gham se mai-KHwaron ko chhuTkara mila

KHum subu shisha surahi jam saghar dekh kar

dawar-e-mahshar ko itni jaanch ki fursat kahan

phenk dega wo mere isyan ka daftar dekh kar

but-parasti tak pahunchti hai kahan naseh ye baat

KHush hua karta hun main KHush-rang patthar dekh kar

gham mujhe kya ho ki tanha mubtala-e-gham nahin

mutmain hai dil mera duniya ko muztar dekh kar

mere dil mein aae wo apne harim-e-naz se

tisra ghar ab na dekhen dusra ghar dekh kar

'nuh' is tufan par kya abr ko tarjih dun

pani pani hai wo josh dida-e-tar dekh kar