hasin chaal ki qainchi chalai jati hai

hasīn chaal kī qaiñchī chalā.ī jaatī hai

adā ke saath hajāmat banā.ī jaatī hai

janāb-e-shaiḳh ko dekhā hai us mahalle meñ

jahāñ sharāb nazar se pilā.ī jaatī hai

'ajīb Dhang se hotī hai ḳhātir-e-'āshiq

hinā.ī haath se chappal dikhā.ī jaatī hai

amīr-e-shahr ke kuttoñ ke tez dāñtoñ se

ġharīb-e-shahr kī haDDī chabā.ī jaatī hai

mire dayār kā dhobī jahāñ bhī jaatā hai

use gadhoñ kī kahānī sunā.ī jaatī hai

ba-vaqt-e-sub.h mujhe salary ke din ghar meñ

banā ke chaa.e adā se pilā.ī jaatī hai

nirālā Dhang hai chorī kā un kī bastī meñ

nazar se hosh kī pūñjī churā.ī jaatī hai

piTā.ī hotī hai us shaḳhs kī sar-e-mahfil

jise adā-e-tabassum dikhā.ī jaatī hai

hasin chaal ki qainchi chalai jati hai

ada ke sath hajamat banai jati hai

janab-e-shaiKH ko dekha hai us mahalle mein

jahan sharab nazar se pilai jati hai

'ajib Dhang se hoti hai KHatir-e-'ashiq

hinai hath se chappal dikhai jati hai

amir-e-shahr ke kutton ke tez danton se

gharib-e-shahr ki haDDi chabai jati hai

mere dayar ka dhobi jahan bhi jata hai

use gadhon ki kahani sunai jati hai

ba-waqt-e-subh mujhe salary ke din ghar mein

bana ke chae ada se pilai jati hai

nirala Dhang hai chori ka un ki basti mein

nazar se hosh ki punji churai jati hai

piTai hoti hai us shaKHs ki sar-e-mahfil

jise ada-e-tabassum dikhai jati hai