jab namak dal mein kam ho to ghazal hoti hai

jab namak daal meñ kam ho to ġhazal hotī hai

mirch sabzī meñ baham ho to ġhazal hotī hai

bhuuk aur pyaas kī shiddat se agar shā'ir ke

peT meñ phūTtā bam ho to ġhazal hotī hai

muflisī qarz za'īfī o tap-e-diq ke sivā

dil ko kuchh aur bhī ġham ho to ġhazal hotī hai

apnī tanḳhvāh bhī ho der se milne vaalī

aur sāmān bhī kam ho to ġhazal hotī hai

apnī aamad se ho kam ḳharch ki zaa.id yaaro

fikr se naak meñ dam ho to ġhazal hotī hai

guDDū lallī kī tarah ghar meñ kisī shā'ir ke

ziddī bachchoñ kā janam ho to ġhazal hotī hai

dum jo ho TeḌhī bhī kutiyā kī to ik she'r na ho

zulf-e-māshūq meñ ḳham ho to ġhazal hotī hai

ye bhī suntā huuñ madakchīyoñ ke muñh se aksar

aag par auñdhī chilam ho to ġhazal hotī hai

she'r-goī nahīñ mauqūf hasīñ lafzoñ par

ḳhūn-e-dil jal ke bhasam ho to ġhazal hotī hai

aa'lā tā'līm-o-sanad bhī nahīñ rah meñ haa.il

ham-navā zor-e-qalam ho to ġhazal hotī hai

raat meñ machchhar-o-khaTmal kā kisī shā'ir par

be-tahāshā jo karam ho to ġhazal hotī hai

hijr kī raat jo baḌh jaa.e to raunaq aa jaa.e

vasl kī 'umr bhī kam ho to ġhazal hotī hai

chorī kā halva kahīñ khāne kī sā'at 'jauhar'

chashm-e-begam kā karam ho to ġhazal hotī hai

jab namak dal mein kam ho to ghazal hoti hai

mirch sabzi mein baham ho to ghazal hoti hai

bhuk aur pyas ki shiddat se agar sha'ir ke

peT mein phuTta bam ho to ghazal hoti hai

muflisi qarz za'ifi o tap-e-diq ke siwa

dil ko kuchh aur bhi gham ho to ghazal hoti hai

apni tanKHwah bhi ho der se milne wali

aur saman bhi kam ho to ghazal hoti hai

apni aamad se ho kam KHarch ki zaid yaro

fikr se nak mein dam ho to ghazal hoti hai

guDDu lalli ki tarah ghar mein kisi sha'ir ke

ziddi bachchon ka janam ho to ghazal hoti hai

dum jo ho TeDhi bhi kutiya ki to ek she'r na ho

zulf-e-mashuq mein KHam ho to ghazal hoti hai

ye bhi sunta hun madakchiyon ke munh se aksar

aag par aundhi chilam ho to ghazal hoti hai

she'r-goi nahin mauquf hasin lafzon par

KHun-e-dil jal ke bhasam ho to ghazal hoti hai

aa'la ta'lim-o-sanad bhi nahin rah mein hail

ham-nawa zor-e-qalam ho to ghazal hoti hai

raat mein machchhar-o-khaTmal ka kisi sha'ir par

be-tahasha jo karam ho to ghazal hoti hai

hijr ki raat jo baDh jae to raunaq aa jae

wasl ki 'umr bhi kam ho to ghazal hoti hai

chori ka halwa kahin khane ki sa'at 'jauhar'

chashm-e-begam ka karam ho to ghazal hoti hai