lun kis se apna kaam abhi zer-e-ghaur hai

luuñ kis se apnā kaam abhī zer-e-ġhaur hai

kis ko karūñ salām abhī zer-e-ġhaur hai

sunnī hai ek ek vahābī hai kaun ho

masjid kā pesh-imām abhī zer-e-ġhaur hai

shādī karā ke yāroñ ne barbād kar diyā

luuñ kis se intiqām abhī zer-e-ġhaur hai

baḳhshā gayā maqām har ik chiiz ko magar

urdu hī kā maqām abhī zer-e-ġhaur hai

ghar mere saat bachchoñ ke saath aa ga.ī haiñ saas

kab tak rahe qiyām abhī zer-e-ġhaur hai

netā bhī shaiḳh jī bhī suḳhanvar bhī aa ga.e

ho kis kā ehtirām abhī zer-e-ġhaur hai

shā'ir hamāre desh ke kāñdhoñ pe bojh haiñ

kyā leñ ham in se kaam abhī zer-e-ġhaur hai

aa.e haiñ bāda-ḳhāne meñ kuchh maulvī bhī aaj

vo bhī uThā.eñ jaam abhī zer-e-ġhaur hai

bhejī hai mere vāste ustād ne ġhazal

kyā duuñ maiñ is kā daam abhī zer-e-ġhaur hai

āzādī-e-ḳhayāl ne shā'ir ko jail dī

'jauhar' tumhārā naam abhī zer-e-ġhaur hai

lun kis se apna kaam abhi zer-e-ghaur hai

kis ko karun salam abhi zer-e-ghaur hai

sunni hai ek ek wahabi hai kaun ho

masjid ka pesh-imam abhi zer-e-ghaur hai

shadi kara ke yaron ne barbaad kar diya

lun kis se intiqam abhi zer-e-ghaur hai

baKHsha gaya maqam har ek chiz ko magar

urdu hi ka maqam abhi zer-e-ghaur hai

ghar mere sat bachchon ke sath aa gai hain sas

kab tak rahe qiyam abhi zer-e-ghaur hai

neta bhi shaiKH ji bhi suKHanwar bhi aa gae

ho kis ka ehtiram abhi zer-e-ghaur hai

sha'ir hamare desh ke kandhon pe bojh hain

kya len hum in se kaam abhi zer-e-ghaur hai

aae hain baada-KHane mein kuchh maulwi bhi aaj

wo bhi uThaen jam abhi zer-e-ghaur hai

bheji hai mere waste ustad ne ghazal

kya dun main is ka dam abhi zer-e-ghaur hai

aazadi-e-KHayal ne sha'ir ko jail di

'jauhar' tumhaara nam abhi zer-e-ghaur hai