aurat

lazzat-e-dīd se dekhoge machal jāoge

aag huuñ haath lagāoge to jal jāoge

mom patthar ko banā duuñ vo asar rakhtī huuñ

paañv sho.aloñ pe to talvār pe sar rakhtī huuñ

ye bahāreñ ye umañgeñ ye masarrat ye shabāb

ye shafaq-rañg manāzir ye shagūfe ye gulāb

ye navāzish ye ināyāt kahāñ pāoge

rab se baḳhshī huī sauġhāt kahāñ pāoge

merī zulfoñ hī kī barsāt se sairāb ho tum

phuul kī tarah mire saa.e meñ shādāb ho tum

ye bhī sach hai ki bayābāñ meñ gulistāñ huuñ maiñ

muztarib ruuh kī taskīn kā sāmāñ huuñ maiñ

muḳhtasar ye ki mujhe pyaar se pā sakte ho

tum mire dil ke gulistān meñ aa sakte ho

gar mirī zaat kā irfān tumheñ mil jaa.e

ye zamīñ kyā hai āsmān tumheñ mil jaa.e

haisiyat kyā hai mirī aur haqīqat kyā hai

maiñ batātī huuñ tumheñ merī fazīlat kyā hai

ek aadam ke alāva koī insān na thā

maiñ na hotī to tumhārā koī imkān na thā

lazzat-e-did se dekhoge machal jaoge

aag hun hath lagaoge to jal jaoge

mom patthar ko bana dun wo asar rakhti hun

panw shoalon pe to talwar pe sar rakhti hun

ye bahaaren ye umangen ye masarrat ye shabab

ye shafaq-rang manazir ye shagufe ye gulab

ye nawazish ye inayat kahan paoge

rab se baKHshi hui saughat kahan paoge

meri zulfon hi ki barsat se sairab ho tum

phul ki tarah mere sae mein shadab ho tum

ye bhi sach hai ki bayaban mein gulistan hun main

muztarib ruh ki taskin ka saman hun main

muKHtasar ye ki mujhe pyar se pa sakte ho

tum mere dil ke gulistan mein aa sakte ho

gar meri zat ka irfan tumhein mil jae

ye zamin kya hai aasman tumhein mil jae

haisiyat kya hai meri aur haqiqat kya hai

main batati hun tumhein meri fazilat kya hai

ek aadam ke alawa koi insan na tha

main na hoti to tumhaara koi imkan na tha