aazadi

mirī sadā hai gul-e-sham-e-shām-e-āzādī

sunā rahā huuñ diloñ ko payām āzādī

lahū vatan ke shahīdoñ kā rañg laayā hai

uchhal rahā hai zamāne meñ nām-e-āzādī

mujhe baqā kī zarūrat nahīñ ki faanī huuñ

mirī fanā se hai paidā davām-e-āzādī

jo raaj karte haiñ jamhūriyat ke parde meñ

unheñ bhī hai sar-o-saudā-e-ḳhām-e-āzādī

banā.eñge na.ī duniyā kisān aur mazdūr

yahī sajā.eñge dīvān-e-ām-e-āzādī

fazā meñ jalte diloñ se dhuāñ sā uThtā hai

are ye sub.h-e-ġhulāmī ye shām-e-āzādī

ye mahr-o-māh ye taare ye baam haft-aflāk

bahut buland hai in se maqām-e-āzādī

fazā-e-shām-e-sahar meñ shafaq jhalaktī hai

ki jaam meñ hai mai-e-lāla-fām-e-āzādī

syāh-ḳhāna-e-duniyā kī zulmateñ haiñ do-rañg

nihāñ hai sub.h-e-asīrī meñ shām-e-āzādī

sukūñ kā naam na le hai vo qaid-e-be-mī.ād

hai pai-ba-pai harakat meñ qayām-e-āzādī

ye kārvān haiñ pasmāñdgān-e-manzil ke

ki rahravoñ meñ yahī haiñ imām-e-āzādī

diloñ meñ ahl-e-zamīñ ke hai niiv us kī magar

qusūr-e-ḳhuld se ūñchā hai bām-e-āzādī

vahāñ bhī ḳhāk-nashīnoñ ne jhanDe gaaḌ diye

milā na ahl-e-duval ko maqām-e-āzādī

hamāre zor se zanjīr-e-tīrgī TuuTī

hamārā soz hai māh-e-tamām-e-āzādī

tarannum-e-saharī de rahā hai jo chhup kar

harīf-e-sub.h-e-vatan hai ye shām-e-āzādī

hamāre siine meñ sho.ale bhaḌak rahe haiñ 'firāq'

hamārī saañs se raushan hai nām-e-āzādī

meri sada hai gul-e-sham-e-sham-e-azadi

suna raha hun dilon ko payam aazadi

lahu watan ke shahidon ka rang laya hai

uchhal raha hai zamane mein nam-e-azadi

mujhe baqa ki zarurat nahin ki fani hun

meri fana se hai paida dawam-e-azadi

jo raj karte hain jamhuriyat ke parde mein

unhen bhi hai sar-o-sauda-e-KHam-e-azadi

banaenge nai duniya kisan aur mazdur

yahi sajaenge diwan-e-am-e-azadi

faza mein jalte dilon se dhuan sa uThta hai

are ye subh-e-ghulami ye sham-e-azadi

ye mahr-o-mah ye tare ye baam haft-aflak

bahut buland hai in se maqam-e-azadi

faza-e-sham-e-sahar mein shafaq jhalakti hai

ki jam mein hai mai-e-lala-fam-e-azadi

syah-KHana-e-duniya ki zulmaten hain do-rang

nihan hai subh-e-asiri mein sham-e-azadi

sukun ka nam na le hai wo qaid-e-be-miad

hai pai-ba-pai harakat mein qayam-e-azadi

ye karwan hain pasmandgan-e-manzil ke

ki rahrawon mein yahi hain imam-e-azadi

dilon mein ahl-e-zamin ke hai niw us ki magar

qusur-e-KHuld se uncha hai baam-e-azadi

wahan bhi KHak-nashinon ne jhanDe gaD diye

mila na ahl-e-duwal ko maqam-e-azadi

hamare zor se zanjir-e-tirgi TuTi

hamara soz hai mah-e-tamam-e-azadi

tarannum-e-sahari de raha hai jo chhup kar

harif-e-subh-e-watan hai ye sham-e-azadi

hamare sine mein shoale bhaDak rahe hain 'firaq'

hamari sans se raushan hai nam-e-azadi