hālat ke taġhayyur par ho mātam-e-māzī kyuuñ

ik vo bhī zamāna thā ik ye bhī zamānā hai

haalat ke taghayyur par ho matam-e-mazi kyun

ek wo bhi zamana tha ek ye bhi zamana hai

tavajjoh chāra-gar kī bā.is-e-taklīf hai 'beḳhud'

izāfa hai musībat meñ davāoñ kā asar karnā

tawajjoh chaara-gar ki bais-e-taklif hai 'beKHud'

izafa hai musibat mein dawaon ka asar karna

kisī se ishq karnā aur is ko bā-ḳhabar karnā

hai apne matlab-e-dushvār ko dushvār-tar karnā

kisi se ishq karna aur is ko ba-KHabar karna

hai apne matlab-e-dushwar ko dushwar-tar karna

karte haiñ arbāb-e-dil andāza-e-josh-e-bahār

merā dāman dekh kar merā garebāñ dekh kar

karte hain arbab-e-dil andaza-e-josh-e-bahaar

mera daman dekh kar mera gareban dekh kar

hamārī nā-umīdī kā to hai ilzām qismat par

tumhārā mudda'ā hotā to manzūr-e-ḳhudā hotā

hamari na-umidi ka to hai ilzam qismat par

tumhaara mudda'a hota to manzur-e-KHuda hota