عمر سے دھوکا کھا گئے پرکھا نہیں ضمیر

بچہ بچہ ہی رہا بڑھتا رہا شریر

اے سترنگی روشنی کیسی شکل بنائی

جو رنگ اپنایا نہیں وہ ہی دیا دکھائی

اپنی ضد کی آگ میں زخمی کئے گلاب

اک وحشی نے ڈال کر کلیوں پر تیزاب

یہ دنیا کی ریت ہے یا دنیا کا دین

جو اوپر چڑھنے لگے کھینچے اسے زمین

ملا پنڈت سب یہاں کرتے رہے فریب

سوچ رہا نیوٹن وہاں گرتا کیوں ہے سیب

مسجد میں پیدا ہوا سیکھی وہی زبان

طوطا مندر پہ چڑھا دینے لگا اذان

ناری جگ کی نیو ہے رشتوں کا آدھار

جیسی نظریں ڈالیے ویسا لے آکار

بڑے شہر سے اپنی دوری رکھیے میلوں میل

جتنی دور سمندر سے ہو اتنی میٹھی جھیل

دنیا ایک سراب ہے پختہ ہوا یقین

میں جتنا چلتا گیا اتنی چلی زمین

مذہب نے جو ٹھونک دی ہلی نہیں وہ کیل

قدرت ہر مخلوق کو روز کرے تبدیل

اپنے اندر میں گیا اک دن کرنے سیر

اتنا آگے بڑھ گیا پیچھے چھوٹے پیر

ان آنکھوں میں قید ہے اس دنیا کا سار

باہر خالی عکس ہے اندر ہے سنسار

پنچھی اڑ کر چل دیا سوکھ گئی جب جھیل

موت ہے اصلی زندگی موت نہیں تکمیل

دن میں مذہب جاگتا لاکھ بھلی ہے رات

ہر تن لاگے ایک سا اک ہی لاگے ذات

کیا مانگیں بھگوان سے کیا دے گا یہ دیر

رکشا خود چلتا نہیں بنا چلائے پیر

راون زندہ ہی رہا صدیوں جلا شریر

ترکش میں تھا ہی نہیں کبھی رام کے تیر

تن بوڑھا ہونے لگا دھندھلے ہو گئے خواب

رنگ سیاہی کا اڑا مٹنے لگی کتاب

پرکھوں کی تصویر گلے میں واحد بنی دلیل

سارے گھر کا مان سنبھالے ایک اکیلی کیل

پہلے ہوا کسان کا بالو بالو کھیت

پھر آندھی مہنگائی کی بھر گئی منہ میں ریت

ہر کروٹ پر ہلچل ہوئے من بھی آپا کھوئے

کون بسا ہے میرے اندر کھنن کھنن کھن ہوئے

اپنے ہی سب ہاتھ چھڑا لیں برا چلے جو کال

عمریں جتنی بڑھتی جائیں اڑتے جائیں بال

روح نہیں یہ روئی ہے انساں ایک لحاف

جب جب یہ میلا ہوا بدلا گیا غلاف

تو مجھ میں محدود ہے میں تجھ میں محدود

میرے سائے میں ترا دکھنے لگا وجود

ایک آنکھ میں دو پتلی ہوں تب ہوگا آدھار

اک پتلی انتر من دیکھے اک دیکھے سنسار

روح بدن کے ساتھ تھی جگ نے دے دی تاپ

پانی نیچے رہ گیا اوپر اڑ گئی بھاپ

چھپا گیا گہرائی میں دریا اپنا حال

میں جب بھی اندر گیا باہر دیا اچھال

کوئی سنبھالے دیر تو کوئی بچائے دین

انسؔ بچا لو آپ ہی مرتی ہوئی زمین

جن کاندھوں پر جھول کر چھوتا تھا آکاش

اک دروازے میں ملی اسی پیڑ کی لاش

سب تیری سائنس ہے پھر یہ کیسا یوگ

خدا نمائندے ترے اتنے پچھڑے لوگ

ملے جو نینن مد بھرے دھڑکا من کا دوار

تن کے اس دربار کا من ہے چوکیدار

کل یہ ہی بن جائے گی اسی گلے کی پھانس

آج ہوا انمول ہے کھینچ زیادہ سانس

مچھلی جوگن ہو گئی چھوڑ دیا ہے تال

ہم نے انجانے کبھی پھینک دیا تھا جال

تو تو فقط زمین ہے پھر بھی ترا قصور

گر املی کے بیج سے نکلا نہیں کھجور

بدن اندھیری کوٹھری کھوجو دیا سلائی

انسؔ جگاؤ چیتنا روشن کرو خدائی

سدھ بدھ کھو گئی بانوری جس دن کھلا فریب

ندیا میں گاگر ملی پنگھٹ پر پازیب

آنکھوں میں پانی بھرا پانی میں گرداب

خواب ہتھیلی پر لیے کھڑا رہا تالاب

پیڑ زرد ہونے لگے پھول ہوئے رسہین

لہو شجر کا کھینچ کر پینے لگی زمین

من کے بھیتر پریم ہے باہر کوچ کٹھور

اتنا میٹھا جل ملے جتنا گہرا بور

پیروں سے کمزور تھی پھر بھی پلٹا کھیل

لپٹ لپٹ کر پیڑ سے اوپر چڑھ گئی بیل

خود کو چھوٹا کر لیا خود میں خود کو بھینچ

بالآخر چرخاب نے لیا سمندر کھینچ

گھس گئی ہڈی ریڑھ کی جھکنے لگا شریر

لوچ کھا گئی چھت مری بکھر گئے شہتیر

شرابور پلکیں ہوئیں کاجل گیا ہے پھیل

اشکوں کے سیلاب میں بکھر گئی کھپریل

یہ کہہ کر تلوار نے چھوڑی آج میان

قید حصار جسم میں اب نہ رہے گی جان

فطرت سے کی اس قدر انسانوں نے چھیڑ

نکلا جنگل جنگ پر لے مٹھی بھر پیڑ

باہر کی اک ٹھیس بھی پیدا کر دے کھوٹ

انڈا جیون پائے جب ہو اندر سے چوٹ

اپنوں کو جب ہم نے پرکھا کھل گئی سب کی پول

جگر کلیجہ تھر تھر کانپے جیبھ نہ کھائی جھول

ماضی کب کا سو گیا سر پر چادر تان

انسؔ کہاں سے جسم پر آنے لگے نشان

کوزہ گر کی انگلیاں روح مری مڑھ جائیں

ہولے سے تن کو چھوئیں اندر تک گڑھ جائیں

دور قیامت روک دے کر مجھ کو برباد

میرے خاطر آئے کیوں دنیا پر افتاد

ہم نے کی ہے گائے کی مذہب سے پہچان

لیکن دیکھا گائے نے سب کو ایک سمان