vāqif kahāñ zamāna hamārī uḌaan se

vo aur the jo haar ga.e āsmān se

waqif kahan zamana hamari uDan se

wo aur the jo haar gae aasman se

rah ga.ī hai kuchh kamī to kyā shikāyat hai 'fahīm'

is jahāñ meñ sab adhūre haiñ mukammal kaun hai

rah gai hai kuchh kami to kya shikayat hai 'fahim'

is jahan mein sab adhure hain mukammal kaun hai

shaam ḳhāmosh hai peḌoñ pe ujālā kam hai

lauT aa.e haiñ sabhī ek parinda kam hai

sham KHamosh hai peDon pe ujala kam hai

lauT aae hain sabhi ek parinda kam hai

na baat dil kī sunūñ maiñ na dil sune merī

ye sard jañg hai apne hī ik mushīr ke saath

na baat dil ki sunun main na dil sune meri

ye sard jang hai apne hi ek mushir ke sath

terī yādeñ ho ga.iiñ jaise muqaddas āyateñ

chain aatā hī nahīñ dil ko tilāvat ke baġhair

teri yaaden ho gain jaise muqaddas aayaten

chain aata hi nahin dil ko tilawat ke baghair