apne jalne meñ kisī ko nahīñ karte haiñ sharīk

raat ho jaa.e to ham sham.a bujhā dete haiñ

apne jalne mein kisi ko nahin karte hain sharik

raat ho jae to hum shama bujha dete hain

samjhegā aadmī ko vahāñ kaun aadmī

banda jahāñ ḳhudā ko ḳhudā māntā nahīñ

samjhega aadmi ko wahan kaun aadmi

banda jahan KHuda ko KHuda manta nahin

ik roz chhīn legī hamīñ se zamīñ hameñ

chhīneñge kyā zamīñ ke ḳhazāne zamīñ se ham

ek roz chhin legi hamin se zamin hamein

chhinenge kya zamin ke KHazane zamin se hum

ġhalat-fahmiyoñ meñ javānī guzārī

kabhī vo na samjhe kabhī ham na samjhe

ghalat-fahmiyon mein jawani guzari

kabhi wo na samjhe kabhi hum na samjhe

aap ke lab pe aur vafā kī qasam

kyā qasam khaa.ī hai ḳhudā kī qasam

aap ke lab pe aur wafa ki qasam

kya qasam khai hai KHuda ki qasam

bhiiḌ tanhā.iyoñ kā melā hai

aadmī aadmī akelā hai

bhiD tanhaiyon ka mela hai

aadmi aadmi akela hai

sau baar jis ko dekh ke hairān ho chuke

jī chāhtā hai phir use ik baar dekhnā

sau bar jis ko dekh ke hairan ho chuke

ji chahta hai phir use ek bar dekhna

aap aa.e haiñ so ab ghar meñ ujālā hai bahut

kahiye jaltī rahe yā sham.a bujhā dī jaa.e

aap aae hain so ab ghar mein ujala hai bahut

kahiye jalti rahe ya shama bujha di jae

kab tak najāt pā.eñge vahm o yaqīñ se ham

uljhe hue haiñ aaj bhī duniyā o diiñ se ham

kab tak najat paenge wahm o yaqin se hum

uljhe hue hain aaj bhi duniya o din se hum

achchhā huā ki sab dar-o-dīvār gir paḌe

ab raushnī to hai mire ghar meñ havā to hai

achchha hua ki sab dar-o-diwar gir paDe

ab raushni to hai mere ghar mein hawa to hai

ā.īna kaisā thā vo shām-e-shakebā.ī kā

sāmnā kar na sakā apnī hī bīnā.ī kā

aaina kaisa tha wo sham-e-shakebai ka

samna kar na saka apni hi binai ka

raushnī ḳhud bhī charāġhoñ se alag rahtī hai

dil meñ jo rahte haiñ vo dil nahīñ hone paate

raushni KHud bhi charaghon se alag rahti hai

dil mein jo rahte hain wo dil nahin hone pate

aisā bhī koī ġham hai jo tum se nahīñ paayā

aisā bhī koī dard hai jo dil meñ nahīñ hai

aisa bhi koi gham hai jo tum se nahin paya

aisa bhi koi dard hai jo dil mein nahin hai

kaam aa.egī mizāj-e-ishq kī āshuftagī

aur kuchh ho yā na ho hañgāma-e-mahfil sahī

kaam aaegi mizaj-e-ishq ki aashuftagi

aur kuchh ho ya na ho hangama-e-mahfil sahi

dostoñ se ye kahūñ kyā ki mirī qadr karo

abhī arzāñ huuñ kabhī pāoge nāyāb mujhe

doston se ye kahun kya ki meri qadr karo

abhi arzan hun kabhi paoge nayab mujhe

ġham-e-daurāñ ko baḌī chiiz samajh rakkhā thā

kaam jab tak na paḌā thā ġham-e-jānāñ se hameñ

gham-e-dauran ko baDi chiz samajh rakkha tha

kaam jab tak na paDa tha gham-e-jaanan se hamein

ḳhvāhishoñ ne dil ko tasvīr-e-tamannā kar diyā

ik nazar ne aa.ine meñ aks gahrā kar diyā

KHwahishon ne dil ko taswir-e-tamanna kar diya

ek nazar ne aaine mein aks gahra kar diya

kamāl-e-zabt meñ yuuñ ashk-e-muztar TuuT kar niklā

asīr-e-ġham koī zindāñ se jaise chhūT kar niklā

kamal-e-zabt mein yun ashk-e-muztar TuT kar nikla

asir-e-gham koi zindan se jaise chhuT kar nikla

ishq aatā na agar rāh-numā.ī ke liye

aap bhī vāqif-e-manzil nahīñ hone paate

ishq aata na agar rah-numai ke liye

aap bhi waqif-e-manzil nahin hone pate

kab tak yaqīn ishq hameñ ḳhud na aa.egā

kab tak makāñ kā haal kaheñge makīñ se ham

kab tak yaqin ishq hamein KHud na aaega

kab tak makan ka haal kahenge makin se hum

abhī to ek vatan chhoḌ kar hī nikle haiñ

hanūz dekhnī baaqī haiñ hijrateñ kyā kyā

abhi to ek watan chhoD kar hi nikle hain

hanuz dekhni baqi hain hijraten kya kya

azal se aaj tak sajde kiye aur ye nahīñ sochā

kisī kā āstāñ kyuuñ hai kisī kā sañg-e-dar kyā hai

azal se aaj tak sajde kiye aur ye nahin socha

kisi ka aastan kyun hai kisi ka sang-e-dar kya hai

ravāñ hai qāfila-e-rūh-e-iltifāt abhī

hamārī raah se haT jaa.e kā.enāt abhī

rawan hai qafila-e-ruh-e-iltifat abhi

hamari rah se haT jae kaenat abhi

ga.e the naqd-e-girāñ-māya-e-ḳhulūs ke saath

ḳharīd laa.e haiñ sastī adāvateñ kyā kyā

gae the naqd-e-giran-maya-e-KHulus ke sath

KHarid lae hain sasti adawaten kya kya

havas-parast adīboñ pe had lage koī

tabāh karte haiñ lafzoñ kī ismateñ kyā kyā

hawas-parast adibon pe had lage koi

tabah karte hain lafzon ki ismaten kya kya

jab ishq thā to dil kā ujālā thā dahr meñ

koī charāġh nūr-badāmāñ nahīñ hai ab

jab ishq tha to dil ka ujala tha dahr mein

koi charagh nur-badaman nahin hai ab

kufr o islām ke jhagḌe ko chukā do sāhab

jañg aapas meñ kareñ shaiḳh o barahman kab tak

kufr o islam ke jhagDe ko chuka do sahab

jang aapas mein karen shaiKH o barahman kab tak

pastī ne bulandī ko banāyā hai haqīqat

ye rif.at-e-aflāk bhī muhtāj-e-zamīñ hai

pasti ne bulandi ko banaya hai haqiqat

ye rifat-e-aflak bhi muhtaj-e-zamin hai

bāl-o-par kī jumbihsoñ ko kaam meñ laate raho

ai qafas vaalo qafas se chhūTnā mushkil sahī

baal-o-par ki jumbihson ko kaam mein late raho

ai qafas walo qafas se chhuTna mushkil sahi

kaun uThā.e ishq ke anjām kī jānib nazar

kuchh asar baaqī haiñ ab tak hairat-e-āġhāz ke

kaun uThae ishq ke anjam ki jaanib nazar

kuchh asar baqi hain ab tak hairat-e-aghaz ke

kyā ma.āl-e-dahr hai merī mohabbat kā ma.aal

haiñ abhī lākhoñ fasāne muntazir āġhāz ke

kya maal-e-dahr hai meri mohabbat ka maal

hain abhi lakhon fasane muntazir aaghaz ke

musāfirān-e-rah-e-shauq sust-e-gām ho kyuuñ

qadam baḌhā.e hue haañ qadam baḌhā.e hue

musafiran-e-rah-e-shauq sust-e-gam ho kyun

qadam baDhae hue han qadam baDhae hue

TukḌe hue the dāman-e-hastī ke jis qadar

dalq-e-gadā-e-ishq ke paivand ho ga.e

TukDe hue the daman-e-hasti ke jis qadar

dalq-e-gada-e-ishq ke paiwand ho gae

is shaan kā āshufta-o-hairāñ na milegā

ā.īne se fursat ho to tasvīr-e-'sabā' dekh

is shan ka aashufta-o-hairan na milega

aaine se fursat ho to taswir-e-'saba' dekh