جائے گی گلشن تلک اس گل کی آمد کی خبر

آئے گی بلبل مرے گھر میں مبارک باد کو

بہت خواب غفلت میں دن چڑھ گیا

اٹھو سونے والو پھر آئے گی رات

ایک دو تین چار پانچ چھ سات

یوں ہی گن لیں گے کم کے کیا معنی

ہچکیاں آتی ہیں پر لیتے نہیں وہ میرا نام

دیکھنا ان کی فراموشی کو میری یاد کو

درد کو گردہ تڑپنے کو جگر

ہجر میں سب ہیں مگر دل تو نہیں

بات کرنے میں ہونٹ لڑتے ہیں

ایسے تکرار کا خدا حافظ

اجی پھینکو رقیب کا نامہ

نہ عبارت بھلی نہ اچھا خط

برگ گل آ میں تیرے بوسے لوں

تجھ میں ہے ڈھنگ یار کے لب کا

رخ ہاتھ پہ رکھا نہ کرو وقت تکلم

ہر بات میں قرآن اٹھایا نہیں جاتا

دیکھو قلعی کھلے گی صاف اس کی

آئینہ ان کے منہ چڑھا ہے آج

تیس دن یار اب نہ آئے گا

اس مہینے کا نام خالی ہے

نہ عاشق ہیں زمانے میں نہ معشوق

ادھر ہم رہ گئے ہیں اور ادھر آپ

کہنا مجنوں سے کہ کل تیری طرف آؤں گا

ڈھونڈنے جاتا ہوں فرہاد کو کہسار میں آج

میں تجھے پھر زمیں دکھاؤں گا

دیکھ مجھ سے نہ آسمان بگڑ

دفن ہم ہو چکے تو کہتے ہیں

اس گنہ گار کا خدا حافظ

تم نہ آسان کو آساں سمجھو

ورنہ مشکل مری مشکل تو نہیں

زندگی تک مری ہنس لیجئے آپ

پھر مجھے روئیے گا میرے بعد

رہتے کعبہ میں اکیلے کیا ہم

دل لگانے کو صنم بھی تو نہ تھے

یوں ہی وعدہ کرو یقیں ہو جائے

کیوں قسم لوں قسم کے کیا معنی

وہ عاشق ہیں کہ مرنے پر ہمارے

کریں گے یاد ہم کو عمر بھر آپ

خال اور رخ سے کس کو دوں نسبت

ایسے تارے نہ ایسا پیارا چاند

خون عشاق ہے معانی میں

شوق سے پان کھائیے صاحب

دیکھیں کہتا ہے خدا حشر کے دن

تم کو کیا غیر کو کیا ہم کو کیا

اس طرف بزم میں ہم تھے وہ تھے

اس طرف شمع تھی پروانہ تھا

رنگت اس رخ کی گل نے پائی ہے

اور پسینے کی بو گلاب میں ہے

دل کلیجہ دماغ سینہ و چشم

ان کے رہنے کے ہیں مکان بہت

سینے سے ہمارا دل نہ لے جاؤ

چھڑواتے ہو کیوں وطن کسی کا

خدا کے پاس کیا جائیں گے زاہد

گنہگاروں سے جب یہ بار پائیں

کی خطابت کو گر خدا سمجھا

بندہ بھی آخر آدمی ہی تو ہے

جیتیں گے نہ ہم سے بازیٔ عشق

اغیار کے پٹ پڑیں گے پانسے

ہم ان سے آج کا شکوہ کریں گے

اکھاڑیں گے وہ برسوں کی گڑی بات

بوسہ ہر وقت رخ کا لیتا ہے

کس قدر گیسوئے دوتا ہے شوخ

آنکھوں سے پائے یار لگانے کی ہے ہوس

حلقہ ہمارے چشم کا اس کی رکاب ہو

تھا حنا سے جو شوخ میرا خوں

بولے یہ لال لال ہے کچھ اور

مرے لاشہ کو کاندھا دے کے بولے

چلو تربت میں اب تم کو سلائیں

تصویر چشم یار کا خواہاں ہے باغباں

ایجاد ہوگی نرگس بیمار کی جگہ

سخیؔ بیٹھیے ہٹ کے کچھ اس کے در سے

بڑی بھیڑ ہوگی کچل جائیے گا

نہ چھوڑا ہجر میں بھی خانۂ تن

رگڑوائے گی کب تک ایڑیاں روح

کیوں حسینوں کی آنکھوں سے نہ لڑے

میری پتلی کی مردمی ہی تو ہے

شیخ جی بت کی برائی کیجے

اپنے اللہ سے بھرپائیے گا

پوجنا بت کا ہے یہ کیا مضمون

اور طواف حرم کے کیا معنی

چرخ پر بدر جس کو کہتے ہیں

یار کا ساغر سفالی ہے

کبھی پہنچے گا دل ان انگلیوں تک

نگینے کی طرح خاتم میں جڑ کے

قافلہ جاتا ہے ساغر کی طرف رندوں کا

ہے مگر قلقل مینا جرس جام شراب

تھا مرا ناخن تراشیدہ

اوج گردوں پہ جو ہلال ہوا

ہمہ تن ہو گئے ہیں آئینہ

خود نمائی سی خود نمائی ہے

نزع کے دم بھی انہیں ہچکی نہ آئے گی کبھی

یوں ہی گر بھولے رہیں گے وہ سخیؔ کی یاد کو

جس کے گھر جاتے نہ تھے حضرت دل

واں لگے پھاند نے دیوار یہ کیا

لی زباں اس کی جو منہ میں ہو گیا ذوق نبات

انگلیاں چوسیں تو ذوق نیشکر پیدا ہوا

کعبہ میں سخت کلامی سن لی

بت کدہ میں نہ کبھی آئیے گا