nahīñ ki zindagī hameñ kahāñ kahāñ liye phirī

hai yuuñ ki ham ga.e use kahāñ kahāñ liye hue

nahin ki zindagi hamein kahan kahan liye phiri

hai yun ki hum gae use kahan kahan liye hue

chāñd hai terā ham-safar koī nahīñ hai rāhbar

aage qadam baḌhā ke rakh duur kī raushnī na dekh

chand hai tera ham-safar koi nahin hai rahbar

aage qadam baDha ke rakh dur ki raushni na dekh

is ehtimām se aksar uThe haiñ paimāne

ki buuñd buuñd ko maiñ jānoñ yā ḳhudā jaane

is ehtimam se aksar uThe hain paimane

ki bund bund ko main jaanon ya KHuda jaane

tum ḳhud hī chale aaoge shāyad sar-e-manzil

ik raah nikālī hai mirī dar-badarī ne

tum KHud hi chale aaoge shayad sar-e-manzil

ek rah nikali hai meri dar-badari ne

baaġh kā dard usī phuul ke dil se pūchho

muskurātā huā jo daur-e-ḳhizāñ se guzre

bagh ka dard usi phul ke dil se puchho

muskuraata hua jo daur-e-KHizan se guzre