ham apne zehn pe vo zaḳhm sah chuke 'shāhid'

davā.eñ jin kī zamāne ne ab nikālī haiñ

hum apne zehn pe wo zaKHm sah chuke 'shahid'

dawaen jin ki zamane ne ab nikali hain

āñkhoñ ke dar band the qaid the sab lamhāt

us ke dil ke shahr meñ guzrī phir ik raat

aankhon ke dar band the qaid the sab lamhat

us ke dil ke shahr mein guzri phir ek raat

sundartā kī baat ho terā zikr na aa.e

maulā! aisī priit ko dīmak hī lag jaa.e

sundarta ki baat ho tera zikr na aae

maula! aisi prit ko dimak hi lag jae

tujh ko DhūñDā chaar sū jaanī ye haq baat

tujh ko mujh meñ khojtī ḳhud hī merī zaat

tujh ko DhunDa chaar su jaani ye haq baat

tujh ko mujh mein khojti KHud hi meri zat

bhītar apne jhāñk kar jogī huā udaas

paayā paanī har jagah khoj na paayā pyaas

bhitar apne jhank kar jogi hua udas

paya pani har jagah khoj na paya pyas

duniyā kī is bhiiḌ meñ kaisā hai sanjog

zanjīroñ meñ qaid haiñ soche samjhe log

duniya ki is bhiD mein kaisa hai sanjog

zanjiron mein qaid hain soche samjhe log