abhī raushan huā jaatā hai rasta

vo dekho ek aurat aa rahī hai

abhi raushan hua jata hai rasta

wo dekho ek aurat aa rahi hai

jhuuT meñ shak kī kam gunjā.ish ho saktī hai

sach ko jab chāho jhuThlāyā jā saktā hai

jhuT mein shak ki kam gunjaish ho sakti hai

sach ko jab chaho jhuThlaya ja sakta hai

umr kā ek aur saal gayā

vaqt phir ham pe ḳhaak Daal gayā

umr ka ek aur sal gaya

waqt phir hum pe KHak Dal gaya

maiñ ne hāthoñ se bujhā.ī hai dahaktī huī aag

apne bachche ke khilaune ko bachāne ke liye

main ne hathon se bujhai hai dahakti hui aag

apne bachche ke khilaune ko bachane ke liye

shadīd garmī meñ kaise nikle vo phūl-chehra

so apne raste meñ dhuup dīvār ho rahī hai

shadid garmi mein kaise nikle wo phul-chehra

so apne raste mein dhup diwar ho rahi hai

sab se pahle dil ke ḳhālī-pan ko bharnā

paisa saarī umr kamāyā jā saktā hai

sab se pahle dil ke KHali-pan ko bharna

paisa sari umr kamaya ja sakta hai

tumhāre ba.ad baḌā farq aa gayā ham meñ

tumhāre ba.ad kisī pe ḳhafā nahīñ hue ham

tumhaare baad baDa farq aa gaya hum mein

tumhaare baad kisi pe KHafa nahin hue hum

koī schōl kī ghanTī bajā de

ye bachcha muskurānā chāhtā hai

koi school ki ghanTi baja de

ye bachcha muskurana chahta hai

agar hamāre hī dil meñ Thikānā chāhiye thā

to phir tujhe zarā pahle batānā chāhiye thā

agar hamare hi dil mein Thikana chahiye tha

to phir tujhe zara pahle batana chahiye tha

kuchh log haiñ jo jhel rahe haiñ musībateñ

kuchh log haiñ jo vaqt se pahle badal ga.e

kuchh log hain jo jhel rahe hain musibaten

kuchh log hain jo waqt se pahle badal gae

rishtoñ kī daldal se kaise nikleñge

har sāzish ke pīchhe apne nikleñge

rishton ki daldal se kaise niklenge

har sazish ke pichhe apne niklenge

zindagī aise bhī hālāt banā detī hai

log sāñsoñ kā kafan oḌh ke mar jaate haiñ

zindagi aise bhi haalat bana deti hai

log sanson ka kafan oDh ke mar jate hain

log kahte haiñ ki is khel meñ sar jaate haiñ

ishq meñ itnā ḳhasāra hai to ghar jaate haiñ

log kahte hain ki is khel mein sar jate hain

ishq mein itna KHasara hai to ghar jate hain

siyāsat ke chehre pe raunaq nahīñ

ye aurat hamesha kī bīmār hai

siyasat ke chehre pe raunaq nahin

ye aurat hamesha ki bimar hai

apne ḳhuun se itnī to ummīdeñ haiñ

apne bachche bhiiḌ se aage nikleñge

apne KHun se itni to ummiden hain

apne bachche bhiD se aage niklenge

maut ko ham ne kabhī kuchh nahīñ samjhā magar aaj

apne bachchoñ kī taraf dekh ke Dar jaate haiñ

maut ko hum ne kabhi kuchh nahin samjha magar aaj

apne bachchon ki taraf dekh ke Dar jate hain

ik bīmār vasiyyat karne vaalā hai

rishte-nāte jiibh nikāle baiThe haiñ

ek bimar wasiyyat karne wala hai

rishte-nate jibh nikale baiThe hain

ġham ke pīchhe maare maare phirnā kyā

ye daulat to ghar baiThe aa jaatī hai

gham ke pichhe mare mare phirna kya

ye daulat to ghar baiThe aa jati hai

mas.ala ḳhatm huā chāhtā hai

dil bas ab zaḳhm nayā chāhtā hai

masala KHatm hua chahta hai

dil bas ab zaKHm naya chahta hai

ho ga.ī hai mirī ujḌī huī duniyā ābād

maiñ use DhūñDh rahā huuñ ye batāne ke liye

ho gai hai meri ujDi hui duniya aabaad

main use DhunDh raha hun ye batane ke liye

har kone se terī ḳhushbū aa.egī

har sandūq meñ tere kapḌe nikleñge

har kone se teri KHushbu aaegi

har sanduq mein tere kapDe niklenge

kin zamīnoñ pe utāroge imdād kā qahr

kaun sā shahr ujāḌoge basāne ke liye

kin zaminon pe utaroge imdad ka qahr

kaun sa shahr ujaDoge basane ke liye

safar se lauT jaanā chāhtā hai

parinda āshiyāna chāhtā hai

safar se lauT jaana chahta hai

parinda aashiyana chahta hai