Sher on Chaak

kabhī ham chaak tak nahīñ pahuñche

aur kabhī kūza-gar se TuuT ga.e

kabhi hum chaak tak nahin pahunche

aur kabhi kuza-gar se TuT gae

mujhe to itnī ḳhabar hai ki musht-e-ḳhāk thā maiñ

jo chāk-e-mohlat-e-girya pe raqs kartā rahā

mujhe to itni KHabar hai ki musht-e-KHak tha main

jo chaak-e-mohlat-e-girya pe raqs karta raha

sar-ba-kaf ghar se nikalnā to hai shart-e-avval

itnā āsān nahīñ chāk-garebāñ honā

sar-ba-kaf ghar se nikalna to hai shart-e-awwal

itna aasan nahin chaak-gareban hona

ye kūza-gar ye chaak ye miTTī ye aag sab

zo’m-e-hunar meñ dekh kahīñ ke nahīñ rahe

ye kuza-gar ye chaak ye miTTi ye aag sab

zo’m-e-hunar mein dekh kahin ke nahin rahe

ek be-chehra badan ko naam dene ke liye

chaak sargarm-e-‘amal hai kūza-gar ḳhāmosh hai

ek be-chehra badan ko nam dene ke liye

chaak sargarm-e-‘amal hai kuza-gar KHamosh hai