زخم پر اشعار

سنا ہے شہر میں زخمی دلوں کا میلہ ہے

چلیں گے ہم بھی مگر پیرہن رفو کر کے

خاموشی کے ناخن سے چھل جایا کرتے ہیں

کوئی پھر ان زخموں پر آوازیں ملتا ہے

اس طرف سے گزرے تھے قافلے بہاروں کے

آج تک سلگتے ہیں زخم رہ گزاروں کے

میں تیرے ہدیۂ فرقت پہ کیسے نازاں ہوں

مری جبیں پہ ترا زخم تک حسین نہیں

شاخ مژگاں پہ مہکنے لگے زخموں کے گلاب

پچھلے موسم کی ملاقات کی بو زندہ ہے

یہ آس بہت ہے کہ ترے دست ستم سے

جتنے بھی ملے گھاؤ ہیں بھر جائیں گے اک دن

تڑپ رہا ہے جو بیتاب ہو کے زخموں سے

یہ راستے میں مرے دل کے ہو بہو کیا ہے

نئے زخم لاتی ہے باد صبا

چمن میں ہر اک پھول بیمار ہے

کھل رہے ہیں گلاب زخموں کے

شکریہ آپ کی نوازش کا

جب اس نے ہار کے خنجر زمیں پہ پھینک دیا

تمام زخم جگر مسکرائے ہیں کیا کیا

آج کس کی جان سے کھیلو گے اے چارہ گرو

آج پہلو میں مرے زخم جگر کوئی نہیں

کسی کے ہاتھ ہی راضی نہ تھے رفو کے لئے

وگرنہ زخم حد اندمال تک آئے

درد کی چاہ میں پہلے تو کریدوں شب بھر

پھر اسی زخم کو سینے کا مزا لیتا ہوں

زخم گنتی تھیں انگلیاں اپنے

کوشش آئینہ گری ہوئی تھی

چارہ گر مرہم بھرے گا تو کہاں

روح تک ہیں زخم کی گہرائیاں

زخم گہرے ہیں مگر اف بھی نہیں کر سکتا

اچھی لگتی نہیں اپنوں کی برائی مجھ کو

وہی جو آدھی رات کو چراغ بن کے جل اٹھا

کسی کی یاد کا نہیں وہ زخم کا نشان ہے

تا عمر ترا نقش فروزاں رہے مجھ میں

اک زخم کی صورت مرے ماتھے پہ ابھر جا

میں نے ہر زخم بہاراں کو چھپا رکھا ہے

مجھ سے مجروح گلستاں کا بھرم ہو تو کہو