چاند میں اور میرا سایہ

کھلے ہیں پھول پیڑوں پر

میں ان کے پاس بیٹھا ہوں

لیے مینا کو پہلو میں

اکیلے بادہ نوشی کر رہا ہوں میں

کہاں ہیں میرے ساتھی ہاں کہاں ہیں سب مرے ساتھی

وہ لو مہتاب مجھ کو دیکھتا ہے آسمانوں سے

درخشانی کو اس کی دیکھ کر میں نے اٹھایا ہاتھ میں ساغر

پکار اٹھا

یہ دیکھو آگے آگے میرے لرزاں ہے مرا سایہ

نہیں ہم تین ہیں ہم تین ہیں تنہا نہیں ہوں میں

اگرچہ ماہ رخشاں بادہ نوشی کر نہیں سکتا

مرے ہر طرف سایہ بھی مرا بس رقص کرتا ہے

مگر ہم آج سب ساتھی ہیں تینوں تینوں ساتھی ہیں

شرابی ماہ رخشاں اور مرا سایہ

میں گاتا ہوں مئے وحشی فضاؤں میں خراماں ہے

میں رقصاں ہوں مرا سایہ بھی ہر سو لڑکھڑاتا ہے

ابھی بیدار ہیں ہم آؤ محو عیش ہو جائیں

بس اک میٹھی سی مدہوشی میں ہی اس درجہ قوت ہے

کہ وہ ہم کو جدا کر دے

چلو ہم آج اک اس قسم کا عہد وفا باندھیں

کہ یہ انسان جو فانی ہیں اس کو جان سکتے ہی نہیں ہرگز

ہم اکثر اس جگہ آ کر ملیں گے شام کے نم دار لمحوں میں

کھلی پھیلی ہوئی بھیگی ہوئی رنگیں فضاؤں میں