daa.ere

tiis centimeter bam kā muhīt thā

aur dā.era-e-asar qarīb qarīb saat meter

is raqbe meñ chaar lāsheñ paḌī haiñ gyārah ghāyal

is ke ird-gird

ek vasī'-tar dā.era vaqt kā aziyyat kā

jis meñ do shifā-ḳhāne aur ek qabristān

sau kilo meter duur apne vatan se aa kar

vo javāñ 'aurat yahāñ dafn ho ga.ī

dā.era aur vasī'-tar hotā gayā

us kā tanhā sogvār

kahīñ samundar paar ek goshe meñ baiThā

dā.ere ko ‘ālam-gīr banā detā hai

ab maiñ us taqsīm kī āh-o-zārī kā kaise zikr karūñ

jo ḳhudā ke pāya-e-taḳht ko chhūtī hai

is dā.ere se aage ek aur dā.era banātī hai

jis kā koī ant nahīñ

jis kā koī ḳhudā nahīñ

tis centimeter bam ka muhit tha

aur daera-e-asar qarib qarib sat meter

is raqbe mein chaar lashen paDi hain gyarah ghayal

is ke ird-gird

ek wasi'-tar daera waqt ka aziyyat ka

jis mein do shifa-KHane aur ek qabristan

sau kilo meter dur apne watan se aa kar

wo jawan 'aurat yahan dafn ho gai

daera aur wasi'-tar hota gaya

us ka tanha sogwar

kahin samundar par ek goshe mein baiTha

daere ko ‘alam-gir bana deta hai

ab main us taqsim ki aah-o-zari ka kaise zikr karun

jo KHuda ke paya-e-taKHt ko chhuti hai

is daere se aage ek aur daera banati hai

jis ka koi ant nahin

jis ka koi KHuda nahin