dil ki us kaa hariim-e-ulfat hai

dil ki us kā harīm-e-ulfat hai

aañkh meñ us kā 'aks-e-tal'at hai

kyā jhuke do jahān ke aage

sar to us kā rahīn-e-minnat hai

tū hai tuubā hai maiñ huuñ aur qad-e-yār

soch sab kī ba-qadr-e-himmat hai

har gul-e-nau meñ rang-o-bū hai vahī

asar-andāz us kī sohbat hai

thā kabhī qais ab hai daur mirā

sab kī do-chār din hukūmat hai

ġham nahīñ jān-o-dil fidā jo hue

ḳhush huuñ is par ki vo salāmat hai

jā na 'hāfiz' ke faqr-e-zāhir par

dil meñ mahbūb kī mohabbat hai

dil ki us ka harim-e-ulfat hai

aankh mein us ka 'aks-e-tal'at hai

kya jhuke do jahan ke aage

sar to us ka rahin-e-minnat hai

tu hai tuba hai main hun aur qad-e-yar

soch sab ki ba-qadr-e-himmat hai

har gul-e-nau mein rang-o-bu hai wahi

asar-andaz us ki sohbat hai

tha kabhi qais ab hai daur mera

sab ki do-chaar din hukumat hai

gham nahin jaan-o-dil fida jo hue

KHush hun is par ki wo salamat hai

ja na 'hafiz' ke faqr-e-zahir par

dil mein mahbub ki mohabbat hai