mai.n pardesii musaafir huu.n tum apnaa yaar mat samjho

maiñ pardesī musāfir huuñ tum apnā yaar mat samjho

mazāre' huuñ tumhārā sarvar-o-sālār mat samjho

tumhāre sāya-e-ehsāñ kā huuñ maiñ sirf ham-sāya

na samjho ham-safar tum mushfiq-o-ġham-ḳhvār mat samjho

sadā gardish meñ rahtā hai tumhārā sharbat-e-rahmat

mujhe tum tishna-o-tab-ḳhūrda-o-bīmār mat samjho

jab is ḳhurshīd se har sang kī khul jā.egī qismat

mujhe phir muntazir aur kushta-e-dīdār mat samjho

gunahgāroñ ke 'isyāñ phūñk Daale vo karam ho tum

mujhe bhī tā.ib-o-mustaġhfir-e-ġhaffār mat samjho

tumhāre bāl-o-par se sab parinde uḌne lagte haiñ

mujhe chiḌiyā samajh lo jāfar-e-tayyār mat samjho

tamāshā-e-nihāñ baḳhshā hai tum ne sone vāloñ ko

mujhe sotā samajh lo hāzir-o-bedār mat samjho

ye tasvīreñ haiñ jism-e-'ishq kab hai 'ishq be-sūrat

ise be-ḳhāl-o-ḳhat juuñ qulzum-e-zaḳhḳhār mat samjho

maiñ ḳhush huuñ is galī meñ ghar mirā vīrān samjho tum

tumhārī bū se ḳhush huuñ nāfa-e-tātār mat samjho

bane haiñ kufr-o-īmāñ aaj jab ki 'ishq azal se hai

kareñ jab 'ishq kāfir tum unheñ kuffār mat samjho

main pardesi musafir hun tum apna yar mat samjho

mazare' hun tumhaara sarwar-o-salar mat samjho

tumhaare saya-e-ehsan ka hun main sirf ham-saya

na samjho ham-safar tum mushfiq-o-gham-KHwar mat samjho

sada gardish mein rahta hai tumhaara sharbat-e-rahmat

mujhe tum tishna-o-tab-KHurda-o-bimar mat samjho

jab is KHurshid se har sang ki khul jaegi qismat

mujhe phir muntazir aur kushta-e-didar mat samjho

gunahgaron ke 'isyan phunk Dale wo karam ho tum

mujhe bhi taib-o-mustaghfir-e-ghaffar mat samjho

tumhaare baal-o-par se sab parinde uDne lagte hain

mujhe chiDiya samajh lo jafar-e-tayyar mat samjho

tamasha-e-nihan baKHsha hai tum ne sone walon ko

mujhe sota samajh lo hazir-o-bedar mat samjho

ye taswiren hain jism-e-'ishq kab hai 'ishq be-surat

ise be-KHal-o-KHat jun qulzum-e-zaKHKHar mat samjho

main KHush hun is gali mein ghar mera viran samjho tum

tumhaari bu se KHush hun nafa-e-tatar mat samjho

bane hain kufr-o-iman aaj jab ki 'ishq azal se hai

karen jab 'ishq kafir tum unhen kuffar mat samjho