yuuñ to hādse bhī hue bahut mirī zindagī meñ magar ye kyā

vo jo ek shaḳhs 'azīz thā yuuñ hī hādsoñ sā guzar gayā

yun to hadse bhi hue bahut meri zindagi mein magar ye kya

wo jo ek shaKHs 'aziz tha yun hi hadson sa guzar gaya

na rahā dil meñ taqaddus na hai tahzīb koī

ho ga.iiñ sharm-o-hayā se tirī ḳhālī āñkheñ

na raha dil mein taqaddus na hai tahzib koi

ho gain sharm-o-haya se teri KHali aankhen

terā ġhurūr khā gayā tere vujūd ko

ab to zarā sī apnī tū gardan jhukā ke chal

tera ghurur kha gaya tere wujud ko

ab to zara si apni tu gardan jhuka ke chal

nashtar tire alfāz haiñ lagte haiñ ye dil par

gar qatl hī karnā hai to ik vaar meñ karnā

nashtar tere alfaz hain lagte hain ye dil par

gar qatl hi karna hai to ek war mein karna

ye saarī 'umr hī ham ne gunāhoñ meñ guzārī hai

gunāhoñ se karo tauba ki ab tauba kī baarī hai

ye sari 'umr hi hum ne gunahon mein guzari hai

gunahon se karo tauba ki ab tauba ki bari hai