zindagī ik āñsuoñ kā jaam thā

pī ga.e kuchh aur kuchh chhalkā ga.e

zindagi ek aansuon ka jam tha

pi gae kuchh aur kuchh chhalka gae

tabāh kar ga.ī pakke makān kī ḳhvāhish

maiñ apne gaañv ke kachche makān se bhī gayā

tabah kar gai pakke makan ki KHwahish

main apne ganw ke kachche makan se bhi gaya

be-sabab baat baḌhāne kī zarūrat kyā hai

ham ḳhafā kab the manāne kī zarūrat kyā hai

be-sabab baat baDhane ki zarurat kya hai

hum KHafa kab the manane ki zarurat kya hai

ġham kā ḳhazāna terā bhī hai merā bhī

ye nazrāna terā bhī hai merā bhī

gham ka KHazana tera bhi hai mera bhi

ye nazrana tera bhi hai mera bhi

terā kūcha tirā dar terī galī kaafī hai

be-Thikānoñ ko Thikāne kī zarūrat kyā hai

tera kucha tera dar teri gali kafi hai

be-Thikanon ko Thikane ki zarurat kya hai

aap ke dam se to duniyā kā bharam hai qaa.em

aap jab haiñ to zamāne kī zarūrat kyā hai

aap ke dam se to duniya ka bharam hai qaem

aap jab hain to zamane ki zarurat kya hai

is soch meñ zindagī bitā dī

jaagā huā huuñ ki so rahā huuñ

is soch mein zindagi bita di

jaga hua hun ki so raha hun

kāñToñ ko pilā ke ḳhuun apnā

rāhoñ meñ gulāb bo rahā huuñ

kanTon ko pila ke KHun apna

rahon mein gulab bo raha hun

mai-ḳhāne kī baat na kar vaa.iz mujh se

aanā jaanā terā bhī hai merā bhī

mai-KHane ki baat na kar waiz mujh se

aana jaana tera bhi hai mera bhi

kaun hai apnā kaun parāyā kyā socheñ

chhoḌ zamāna terā bhī hai merā bhī

kaun hai apna kaun paraya kya sochen

chhoD zamana tera bhi hai mera bhi

girne do tum mujhe mirā sāġhar sambhāl lo

itnā to mere yaar karo maiñ nashe meñ huuñ

girne do tum mujhe mera saghar sambhaal lo

itna to mere yar karo main nashe mein hun

kuchh to ho raat kī sarhad meñ utarne kī sazā

garm sūraj ko samundar meñ Duboyā jaa.e

kuchh to ho raat ki sarhad mein utarne ki saza

garm suraj ko samundar mein Duboya jae

paayā nahīñ vo jo kho rahā huuñ

taqdīr ko apnī ro rahā huuñ

paya nahin wo jo kho raha hun

taqdir ko apni ro raha hun

shahr meñ galiyoñ galiyoñ jis kā charchā hai

vo afsāna terā bhī hai merā bhī

shahr mein galiyon galiyon jis ka charcha hai

wo afsana tera bhi hai mera bhi

itnī jaldī to badalte nahīñ hoñge chehre

gard-ālūd hai ā.īne ko dhoyā jaa.e

itni jaldi to badalte nahin honge chehre

gard-alud hai aaine ko dhoya jae

vo bhī dhartī pe utārī huī maḳhlūq hī hai

jis kā kaaTā huā insān na paanī māñge

wo bhi dharti pe utari hui maKHluq hi hai

jis ka kaTa hua insan na pani mange

Thukrāo ab ki pyaar karo maiñ nashe meñ huuñ

jo chāho mere yaar karo maiñ nashe meñ huuñ

Thukrao ab ki pyar karo main nashe mein hun

jo chaho mere yar karo main nashe mein hun