yā to jo nā-fahm haiñ vo bolte haiñ in dinoñ

yā jinheñ ḳhāmosh rahne kī sazā ma.alūm hai

ya to jo na-fahm hain wo bolte hain in dinon

ya jinhen KHamosh rahne ki saza malum hai

hazār rañg meñ mumkin hai dard kā iz.hār

tire firāq meñ marnā hī kyā zarūrī hai

hazar rang mein mumkin hai dard ka izhaar

tere firaq mein marna hi kya zaruri hai

'shujā' vo ḳhairiyat pūchheñ to hairat meñ na paḌ jaanā

pareshāñ karne vaale ḳhair-ḳhvāhoñ meñ bhī hote haiñ

'shuja' wo KHairiyat puchhen to hairat mein na paD jaana

pareshan karne wale KHair-KHwahon mein bhi hote hain

ghar meñ bechainī ho to agle safar kī sochnā

phir safar nākām ho jaa.e to ghar kī sochnā

ghar mein bechaini ho to agle safar ki sochna

phir safar nakaam ho jae to ghar ki sochna

aap idhar aa.e udhar diin aur īmān ga.e

iid kā chāñd nazar aayā to ramzān ga.e

aap idhar aae udhar din aur iman gae

id ka chand nazar aaya to ramzan gae