کتنی فریادیں لبوں پر رک گئیں

کتنے اشک آہوں میں ڈھل کر رہ گئے

حسن کا دامن پھر بھی خالی

عشق نے لاکھوں اشک بکھیرے

سو بار چمن مہکا سو بار بہار آئی

دنیا کی وہی رونق دل کی وہی تنہائی

جب بھی دو آنسو نکل کر رہ گئے

درد کے عنواں بدل کر رہ گئے

کون کس کا غم کھائے کون کس کو بہلائے

تیری بے کسی تنہا میری بے بسی تنہا

میں تحفہ لے کے آیا ہوں تمناؤں کے پھولوں کا

لٹانے کو بہار زندگانی لے کے آیا ہوں

جانے کس کی تھی خطا یاد نہیں

ہم ہوئے کیسے جدا یاد نہیں

دیکھے ہیں بہت ہم نے ہنگامے محبت کے

آغاز بھی رسوائی انجام بھی رسوائی

ملتے گئے ہیں موڑ نئے ہر مقام پر

بڑھتی گئی ہے دوریاں منزل جگہ جگہ

اس عالم ویراں میں کیا انجمن آرائی

دو روز کی محفل ہے اک عمر کی تنہائی

آج تبسمؔ سب کے لب پر

افسانے ہیں میرے تیرے

اک فقط یاد ہے جانا ان کا

اور کچھ اس کے سوا یاد نہیں

ایسا نہ ہو یہ درد بنے درد لا دوا

ایسا نہ ہو کہ تم بھی مداوا نہ کر سکو

ایک شعلہ سا اٹھا تھا دل میں

جانے کس کی تھی صدا یاد نہیں

روز دہراتے تھے افسانۂ دل

کس طرح بھول گیا یاد نہیں

کھل کے رونے کی تمنا تھی ہمیں

ایک دو آنسو نکل کر رہ گئے

دلوں کا ذکر ہی کیا ہے ملیں ملیں نہ ملیں

نظر ملاؤ نظر سے نظر کی بات کرو

اوروں کی محبت کے دہرائے ہیں افسانے

بات اپنی محبت کی ہونٹوں پہ نہیں آئی