چائے پر اشعار

اک ہاتھ میں میرے چائے کا کپ اک ہاتھ میں میرے ہاتھ ترا

ہاتھوں کو طلب ہے ہاتھوں کی اور دل کو طلب ہے ساتھ ترا

آج پھر چائے بناتے ہوئے وہ یاد آیا

آج پھر چائے میں پتی نہیں ڈالی میں نے

چھوڑ آیا تھا میز پر چائے

یہ جدائی کا استعارا تھا

شام کی چائے ان کے ساتھ پیوں

دل کی حسرت بہت پرانی ہے

آ میرے ساتھ بیٹھ مرے ساتھ چائے پی

آ میرے ساتھ میرے دلائل پہ بات کر

گرم موسم میں گرم چائے بھی

بد مزاجوں کا پیار لگتی ہے

تیرے ہاتھ کی چائے تو پی تھی

دل کا رنج تو دل میں رہا تھا

ہنس پڑی شام کی اداس فضا

اس طرح چائے کی پیالی ہنسی

آ ترے سنگ ذرا پینگ بڑھائی جائے

زندگی بیٹھ تجھے چائے پلائی جائے

چائے کی پیالی میں نیلی ٹیبلٹ گھولی

سہمے سہمے ہاتھوں نے اک کتاب پھر کھولی

شعر جیسا بھی ہو اس شہر میں پڑھ سکتے ہو

چائے جیسی بھی ہو آسام میں بک جاتی ہے

میں نے پوچھا ہے کہ چائے کے لیے وقت کوئی

ہنس کے بولی ہے اشارے سے گھڑی ٹھیک نہیں

پھر کہیں بیٹھ کے پی جائے اکٹھے چائے

پھر کوئی شام کا پل ساتھ گزارا جائے

ایسی چائے کبھی نہ پی میں نے

سچ بتا تو نے اس میں کیا ڈالا

سستے میں ان کو بھولنا اچھا لگا ہے آج

چائے کا ایک گھونٹ بھی کافی رہا ہے آج

چائے میں ڈال کر عشاق اسے پی جاتے

در حقیقت لب معشوق جو شکر ہوتا

شاعری چائے تری یاد چمکتے جگنو

بس یہی چار طلب روز مری شام کے ہیں

ہم جہاں چائے پینے جاتے تھے

کیا وہاں اب بھی آیا کرتے تھے

ٹھنڈی چائے کی پیالی پی کے

رات کی پیاس بجھائی ہے

نہیں ہے گھر میں تری یاد کے علاوہ کچھ

تو کس کے سامنے چائے بنا کے رکھتی ہوں

سامنے رکھ کے چائے کی پیالی

چسکی چسکی تری کمی چکھی

آپ اخبار دیکھیے تب تک

میں ابھی چائے لے کر آتی ہوں

کبھی تو بیٹھ کے یاروں کے ساتھ چائے پی

کبھی تو بیٹھ کے فرصت سے دن گزارا کر

چائے کی برکت سے خالی ہیں

دیر میں اکثر اٹھنے والے

میں اس کی چائے کی پیالی تھی لیکن

اسے پینے کی جرأت ہی نہیں تھی

لو چائے میں بھی چائے کی پتی نہیں ڈالی

تم کو تو محبت کے سوا کچھ نہیں آتا

شام کی چائے کا وعدہ وہ ادھر بھول گئے

ہم ادھر صبح سے تیار ہوئے بیٹھے ہیں

چائے کے ایک کپ کا یہی ہے معاوضہ

یاروں کو عہد رفتہ کے قصے سنائیے

تیری ٹینشن میں پینا بھول گئی

چائے تو سامنے رکھی ہوئی تھی

پھر چائے میں بسکٹ کی طرح بھوکی سی یہ شام

کھا جائے گی سورج کو سمندر میں ڈبا کر

روز ہم چائے ساتھ پیتے تھے

بات آگے کبھی بڑھی ہی نہیں

تھوڑی دیر میں ٹرین نکلنے والی ہے

سن تھوڑی ہی دیر میں چائے آتی ہے

چائے پینا تو اک بہانہ تھا

آرزو دل کی ترجمانی تھی

اس کا خیال دل میں گھڑی دو گھڑی رہے

پھر اس کے بعد میز پہ چائے پڑی رہے

وہ چائے پی رہا تھا کسی دوسرے کے ساتھ

مجھ پر نگاہ پڑتے ہی کچھ جھینپ سا گیا

نام میرا یاد کرکے چسکیوں کے بیچ میں

کیا ہوئی ہے چائے کے کپ میں ترے ہلچل کبھی

گرم چائے پی ہے تیری یاد کی

تشنہ لب ہوں شربت دیدار کا

چائے میں مت ملائیے شکر کہ ہے ضرر رساں

شامل مٹھاس واسطے اپنا لعاب کیجیے

ایک چائے کیا جان دیتی میں

شکریہ ایسے کہہ رہا تھا وہ

چائے کے تلخ گھونٹ سے اٹھتا ہوا غبار

وہ انتظار شام وہ منظر کہاں گیا

کپ میں گرمی دکھا رہی تھی بہت

چائے ساسر میں ڈال دی میں نے

ہیں دسترس میں ابھی بھی طاہرؔ اٹھا کے اب اس کو پی بھی ڈالو

مشاہدوں میں ہی ہو گئی گر یہ ٹھنڈی چائے تو کیا کرو گے

چائے میرے ہاتھ سے گرنے والی تھی

اس نے اس انداز سے گھورا توبہ ہے

بھاپ اڑاڑ کے میری چائے سے

اس کا پیکر بناتی رہتی ہے

چائے میں اس کے پستاں تھے

میرا بدن پانی میں تھا

میں نے چائے جو پیش کی تھی اسے

اک تکلف میں پڑ گیا تھا وہ

دھیان اک بیتے ملن کے دوار

لب چائے کی پیالی پر

شب ڈھلی اٹھنے لگے ہوٹل سے لوگ

چائے کا یہ دور اس کے نام پر

چائے کے کپ میں ابلی

اخباروں کی سرخی دھوپ