pariyoñ ke des vaalī kahānī bhī ḳhuub hai
bachchoñ ko jis ne phir yūñhī bhūkā sulā diyā
pariyon ke des wali kahani bhi KHub hai
bachchon ko jis ne phir yunhi bhuka sula diya
tarāshte haiñ jo patthar ko saḳht garmī meñ
phir un kā rizq batāo halāl hai ki nahīñ
tarashte hain jo patthar ko saKHt garmi mein
phir un ka rizq batao halal hai ki nahin
yahāñ ġharīb ko sab kuchh to de diyā us ne
zamīñ bichhā.e hai aur āsmān oḌhe hai
yahan gharib ko sab kuchh to de diya us ne
zamin bichhae hai aur aasman oDhe hai
ghar kī chaukhaT pe aa.e muflis kī
har sadā bas sadā nahīñ hotī
ghar ki chaukhaT pe aae muflis ki
har sada bas sada nahin hoti
gul-faroshoñ ke bachche garmī meñ
haa.e afsos bhūke sote haiñ
gul-faroshon ke bachche garmi mein
hae afsos bhuke sote hain
ḳhudā ke naam pe dete na the so tang aa kar
qamīz phaaḌ lī thoḌī sī ik bhikāran ne
KHuda ke nam pe dete na the so tang aa kar
qamiz phaD li thoDi si ek bhikaran ne
hameñ bhī fāqa-kashī ne kāfir banā diyā hai
ḳhayāl roTī ke aaj sajde meñ aa gaye the
hamein bhi faqa-kashi ne kafir bana diya hai
KHayal roTi ke aaj sajde mein aa gaye the
tavā.if mar ga.ī fāqa-kashī se
nagar saarā namāzī ho chukā thā
tawaif mar gai faqa-kashi se
nagar sara namazi ho chuka tha
-
Tag : Prostitute
