مری زبان کے موسم بدلتے رہتے ہیں

میں آدمی ہوں مرا اعتبار مت کرنا

بدل گیا ہے زمانہ بدل گئی دنیا

نہ اب وہ میں ہوں مری جاں نہ اب وہ تو تو ہے

تیز اتنا ہی اگر چلنا ہے تنہا جاؤ تم

بات پوری بھی نہ ہوگی اور گھر آ جائے گا

وقت بے وقت جھلکتا ہے مری صورت سے

کون چہرہ مری تشکیل میں آیا ہوا ہے

انتہائی حسین لگتی ہے

جب وہ کرتی ہے روٹھ کر باتیں

عجیب شور مچانے لگے ہیں سناٹے

یہ کس طرح کی خموشی ہر اک صدا میں ہے

اب یہی سوچتے رہتے ہیں بچھڑ کر تجھ سے

شاید ایسے نہیں ہوتا اگر ایسا کرتے

تمہارے ساتھ مرے مختلف مراسم ہیں

مری وفا پہ کبھی انحصار مت کرنا

سیکھا نہ دعاؤں میں قناعت کا سلیقہ

وہ مانگ رہا ہوں جو مقدر میں نہیں ہے

تری زمین پہ کرتا رہا ہوں مزدوری

ہے سوکھنے کو پسینہ معاوضہ ہے کہاں

بنا رکھا ہے منصوبہ کئی برسوں کا تو نے

اگر اک دن اچانک تجھ کو مرنا پڑ گیا تو

غلط روی کو تری میں غلط سمجھتا ہوں

یہ بے وفائی بھی شامل مری وفا میں ہے

یہ ہم سفر تو سبھی اجنبی سے لگتے ہیں

میں جس کے ساتھ چلا تھا وہ قافلہ ہے کہاں

لوگ کہتے ہیں کہ وہ شخص ہے خوشبو جیسا

ساتھ شاید اسے لے آئے ہوا دیکھتے ہیں

نہیں وہ شمع محبت رہی تو پھر عاصمؔ

یہ کس دعا سے مرے گھر میں روشنی سی ہے

تم اس رستے میں کیوں بارود بوئے جا رہے ہو

کسی دن اس طرف سے خود گزرنا پڑ گیا تو

کسی بھی کام میں لگتا نہیں ہے دل میرا

بڑے دنوں سے طبیعت بجھی بجھی سی ہے

مجھے خبر ہی نہیں تھی کہ عشق کا آغاز

اب ابتدا سے نہیں درمیاں سے ہوتا ہے

تو مرے پاس جب نہیں ہوتا

تجھ سے کرتا ہوں کس قدر باتیں

میں انہماک میں یہ کس مقام تک پہنچا

تجھے ہی بھول گیا تجھ کو یاد کرتے ہوئے

کہیں کہیں تو زمیں آسماں سے اونچی ہے

یہ راز مجھ پہ کھلا سیڑھیاں اترتے ہوئے

ہے ی امید مرے خواب میں آپ آئیں گے

ایک در آنکھ کا رکھتا ہوں کھلا رات کے وقت

زاویہ دھوپ نے کچھ ایسا بنایا ہے کہ ہم

سائے کو جسم کی جنبش سے جدا دیکھتے ہیں

ہم اپنے باغ کے پھولوں کو نوچ ڈالتے ہیں

جب اختلاف کوئی باغباں سے ہوتا ہے

ہونٹوں کو پھول آنکھ کو بادہ نہیں کہا

تجھ کو تری ادا سے زیادہ نہیں کہا

خشک رت میں اس جگہ ہم نے بنایا تھا مکان

یہ نہیں معلوم تھا یہ راستہ پانی کا ہے

کچھ وہ بھی طبیعت کا سکھی ایسا نہیں ہے

کچھ ہم بھی محبت میں قناعت نہیں کرتے