کیا رہ گیا ہے شہر میں کھنڈرات کے سوا

کیا دیکھنے کو اب یہاں آئے ہوئے ہیں لوگ

چوراہوں کا تو حسن بڑھا شہر کے مگر

جو لوگ نامور تھے وہ پتھر کے ہو گئے

جوان ہو گئی اک نسل سنتے سنتے غزل

ہم اور ہو گئے بوڑھے غزل سناتے ہوئے

اپنی تصویر بناؤ گے تو ہوگا احساس

کتنا دشوار ہے خود کو کوئی چہرہ دینا

ہمارے سر کی بلندی تک آؤ تو دیکھو

فراز دار سے کیا کیا دکھائی دیتا ہے

نیا خوں رگوں میں رواں کر دیا

غزل ہم نے تجھ کو جواں کر دیا

کسی کے عیب چھپانا ثواب ہے لیکن

کبھی کبھی کوئی پردہ اٹھانا پڑتا ہے

شکستگی میں بھی کیا شان ہے عمارت کی

کہ دیکھنے کو اسے سر اٹھانا پڑتا ہے

یہ بھی رہا ہے کوچۂ جاناں میں اپنا رنگ

آہٹ ہوئی تو چاند دریچے میں آ گیا

سنبھل کے چلنے کا سارا غرور ٹوٹ گیا

اک ایسی بات کہی اس نے لڑکھڑاتے ہوئے

اب مرے بعد کوئی سر بھی نہیں ہوگا طلوع

اب کسی سمت سے پتھر بھی نہیں آئے گا

ہر ایک رات کو مہتاب دیکھنے کے لیے

میں جاگتا ہوں ترا خواب دیکھنے کے لیے

گھر سے کس طرح میں نکلوں کہ یہ مدھم سا چراغ

میں نہیں ہوں گا تو تنہائی میں بجھ جائے گا

وہ تڑپ جائے اشارہ کوئی ایسا دینا

اس کو خط لکھنا تو میرا بھی حوالہ دینا

پلٹ چلیں کہ غلط آ گئے ہمیں شاید

رئیس لوگوں سے ملنے کے وقت ہوتے ہیں

تمام شہر سے بد ظن کرا دیا شہہ کو

مصاحبوں کا خدا جانے تھا ارادہ کیا

کبھی قریب کبھی دور ہو کے روتے ہیں

محبتوں کے بھی موسم عجیب ہوتے ہیں

جہاں ضدیں کیا کرتا تھا بچپنا میرا

کہاں سے لاؤں کھلونوں کی ان دکانوں کو

لوگ یوں کہتے ہیں اپنے قصے

جیسے وہ شاہ جہاں تھے پہلے

راستو کیا ہوئے وہ لوگ کہ آتے جاتے

میرے آداب پہ کہتے تھے کہ جیتے رہیے

ہم عصروں میں یہ چھیڑ چلی آئی ہے اظہرؔ

یاں ذوقؔ نے غالبؔ کو بھی غالب نہیں سمجھا

میں جسے ڈھونڈنے نکلا تھا اسے پا نہ سکا

اب جدھر جی ترا چاہے مجھے خوشبو لے جا

آج بھی شام غم! اداس نہ ہو

مانگ کر میں چراغ لاتا ہوں

کرنے کو روشنی کے تعاقب کا تجربہ

کچھ دور میرے ساتھ بھی پرچھائیاں گئیں

یہ الگ بات کہ میں نوح نہیں تھا لیکن

میں نے کشتی کو غلط سمت میں بہنے نہ دیا

آج شہروں میں ہیں جتنے خطرے

جنگلوں میں بھی کہاں تھے پہلے

میری خاموشی پہ تھے جو طعنہ زن

شور میں اپنے ہی بہرے ہو گئے

یہ اور بات کہ آندھی ہمارے بس میں نہیں

مگر چراغ جلانا تو اختیار میں ہے

وہ جس کے صحن میں کوئی گلاب کھل نہ سکا

تمام شہر کے بچوں سے پیار کرتا تھا

وہ تازہ دم ہیں نئے شعبدے دکھاتے ہوئے

عوام تھکنے لگے تالیاں بجاتے ہوئے

عجب جنون ہے یہ انتقام کا جذبہ

شکست کھا کے وہ پانی میں زہر ڈال آیا

سب دیکھ کر گزر گئے اک پل میں اور ہم

دیوار پر بنے ہوئے منظر میں کھو گئے

ہوا اجالا تو ہم ان کے نام بھول گئے

جو بجھ گئے ہیں چراغوں کی لو بڑھاتے ہوئے

اس راستے میں جب کوئی سایہ نہ پائے گا

یہ آخری درخت بہت یاد آئے گا

جوانوں میں تصادم کیسے رکتا

قبیلے میں کوئی بوڑھا نہیں تھا

نقش مٹتے ہیں تو آتا ہے خیال

ریت پر ہم بھی کہاں تھے پہلے

تمام شہر میں کس طرح چاندنی پھیلی

کہ ماہتاب تو کل رات میرے گھر میں تھا

پرانے عہد میں بھی دشمنی تھی

مگر ماحول زہریلا نہیں تھا

مجھ کو بھی جاگنے کی اذیت سے دے نجات

اے رات اب تو گھر کے در و بام سو گئے

غزل کا شعر تو ہوتا ہے بس کسی کے لیے

مگر ستم ہے کہ سب کو سنانا پڑتا ہے

اس کار آگہی کو جنوں کہہ رہے ہیں لوگ

محفوظ کر رہے ہیں فضا میں صدائیں ہم

ان کے بھی اپنے خواب تھے اپنی ضرورتیں

ہم سایے کا مگر وہ گلا کاٹتے رہے

خود اپنے پاؤں بھی لوگوں نے کر لیے زخمی

ہماری راہ میں کانٹے یہاں بچھاتے ہوئے

تاریخ بھی ہوں اتنے برس کی مورخو

چہرے پہ میرے جتنے برس کی یہ گرد ہے

خود کشی کے لیے تھوڑا سا یہ کافی ہے مگر

زندہ رہنے کو بہت زہر پیا جاتا ہے

اپنے آنچل میں چھپا کر مرے آنسو لے جا

یاد رکھنے کو ملاقات کے جگنو لے جا

یہ مسخروں کو وظیفے یوں ہی نہیں ملتے

رئیس خود نہیں ہنستے ہنسانا پڑتا ہے