maut se pahle jahāñ meñ chand sāñsoñ kā azaab

zindagī jo qarz terā thā adā kar aa.e haiñ

maut se pahle jahan mein chand sanson ka azab

zindagi jo qarz tera tha ada kar aae hain

vasl kī shab thī aur ujāle kar rakkhe the

jism o jaañ sab us ke havāle kar rakkhe the

wasl ki shab thi aur ujale kar rakkhe the

jism o jaan sab us ke hawale kar rakkhe the

dil ko to bahut pahle se dhaḌkā sā lagā thā

paanā tirā shāyad tujhe khone ke liye hai

dil ko to bahut pahle se dhaDka sa laga tha

pana tera shayad tujhe khone ke liye hai

daraḳhtoñ par parinde lauT aanā chāhte haiñ

ḳhizāñ-rut kā guzar jaanā zarūrī ho gayā hai

daraKHton par parinde lauT aana chahte hain

KHizan-rut ka guzar jaana zaruri ho gaya hai

chāñd ban kar chamakne vaale ne

mujh ko sūraj-misāl kar Daalā

chand ban kar chamakne wale ne

mujh ko suraj-misal kar Dala

paanī meñ bhī chāñd sitāre ug aate haiñ

aañkh se dil tak vo zarḳhezī ho jaatī hai

pani mein bhi chand sitare ug aate hain

aankh se dil tak wo zarKHezi ho jati hai